Samtök sveitarfélaga á Norðurlandi vestra (SSNV) hafa áhyggjur af fyrirhugaðri fækkun lögregluembætta.
Formaður stjórnar SSNV segir þetta enn eina aðförina að þjónustu á landsbyggðinni.
„Við erum bara mjög hrædd um það að þetta sé enn ein aðförin að því að draga úr þjónustu hins opinbera gagnvart íbúum. Við höfum bara áhyggjur af því að á endanum komi þetta bara niður á íbúum og þeirri þjónustu sem lögreglan er að veita í dag,“ segir Einar E. Einarsson, formaður stjórnar SSNV.
Til stendur að fækka lögregluembættum landsins úr níu í fimm. Í tilkynningu frá dómsmálaráðuneytinu segir að frumvarp þess efnis verði lagt fram í haust og komi til með að efla löggæslu og fjölga lögreglumönnum. Vinna við breytingarnar er enn á frumstigi og haft verður samráð við lögregluna um land allt.
Sigurður Hólmar Kristjánsson, settur lögreglustjóri á Norðurlandi vestra, vakti athygli á málinu við SSNV en vildi ekki tjá sig þegar fréttastofa leitaði eftir því. Hann vonist þó eftir fundi með ráðherra sem fyrst.
Hafa áhyggjur af fækkun opinbera starfa á landsbyggðinni
„Reynslan segir okkur að svona breytingar leiða yfirleitt til þess að það er verið að fækka störfum. Því miður er það þróunin hér á Norðurlandi vestra að opinberum störfum hefur fækkað hér ár eftir ár meðan þeim hefur fjölgað í öðrum landshlutum,“ segir Einar og á hann von á því að heyra frá dómsmálaráðuneytinu þrátt fyrir að hafa engin viðbrögð fengið ennþá.
Páley Borgþórsdóttir, lögreglustjóri á Norðurlandi eystra, segir við fréttastofu að hún sé hlynnt breytingunum. Það sé skynsamlegt að hafa það að markmiði að efla löggæslu um allt land, eins og ráðherra segist ætla að gera. Breytingar séu oft erfiðar en hún skilji það ekki þannig að til standi að fækka lögreglumönnum eða loka lögreglustöðvum.
