Grady Judd lögreglustjóri í Polk-sýslu greindi frá því á blaðamannafundi í gær, samkvæmt umfjöllun CBS, að lögregluaðgerðin hefði staðið yfir í sjö daga. Lögreglumenn hefðu beint sjónum sínum að meintum kynferðisbrotamönnum sem ferðast til þess að hitta börn til að eiga í ólöglegu samræði við þau og stunda mansal.
Hann sagði að 31 sakborningur hefði ferðast til sýslunnar til þess að eiga í samræði við barn. Judd tók fram að þrettán hinna grunuðu væru starfsmenn Disney World og fjórir væru starfsmenn Universal Studios.
„Það er gríðarlega óhugnanlegt þegar við rekumst á viðbjóðslega barnaníðinga eins og þessa sem vilja ólmir stunda kynlíf með börnum. Það er þess vegna sem við ráðumst í slíkar leyniaðgerðir,“ sagði hann í yfirlýsingu.
Hann tók fram að 32 hinna grunuðu í málinu væru óskráðir innflytjendur og þar af hefðu sextán þegar verið afhentir innflytjenda- og tollaeftirliti Bandaríkjanna, eða ICE. Þá hefðu 24 af hinum grunuðu tekið skotvopn með sér þegar þeir hyggðust hitta börn og níu hefðu verið á skilorði.
Lögreglustjórinn tók fram að einn hinna grunuðu væri fótboltaþjálfari hjá Davenport Titans og þjálfaði þar börn á aldrinum 11 til 14 ára. Hann hafi talið sig vera á leiðinni að hitta 14 ára stelpu. Annar sakborningur hafi verið í virkri herþjónustu.
Annar maður hafi verið fyrrverandi starfsmaður Disney þar sem hann klæddist búningi sem karakter úr Mikka Mús. Sá hafi einnig haft svokallað „bleyjublæti“. Lögreglumenn höfðu hendur í hári hans með tvo fulla bakpoka af bleyjum, að sögn lögreglustjórans.
Jafnframt hafi annar starfsmaður Disney verið handtekinn þar sem hann taldi sig vera að 13 ára strák, sem reyndist vera (fullorðinn) rannsóknarlögreglumaður. Sá hafi geymt vinnufötin sín í bílnum sínum á meðan hann ætlaði að hitta hinn meinta dreng.
Disney vann með lögregluyfirvöldum að málinu, að sögn Judd.
