Hreyfingar hafa mælst í hlíðinni ofan við austanverðan Svínafellsjökul í Öræfum en það er í fyrsta sinn síðan vöktun var komið þar upp árið 2018 sem hreyfingar sjást svo greinilega að því er segir á vef Veðurstofu Íslands.
Aflögunin mælist frá einum upp í þrjá sentimetra en engin merki eru um að þetta tengist breytingum á eldstöðinni í Öræfajökli.
Stór skriða féll úr hlíðinni niður á jökulinn árið 2013, en samkvæmt hættumati sem gert var á síðasta ári eru litlar líkur á að skriða úr hlíðinni muni ógna byggð, en stórt hlaup gæti þó náð niður í lónið framan við jökulinn og valdið flóði.
Hreyfingarnar eru hægar og benda ekki einar og sér til bráðrar hættu á berghlaupi en það mat getur breyst. Hreyfingarnar gætu skýrst af vatnsþrýstingi innan fjallsins en úrkoma í Skaftafelli hefur verið yfir meðallagi.
Þær kalla ekki á sérstakan viðbúnað að svo stöddu, umfram aukna vöktun sérfræðinga Veðurstofu og Háskóla Íslands.
Fyrirhugað er að fara á vettvang þegar aðstæður leyfa, mæla fasta mælipunkta, taka myndir með dróna og yfirfara mælibúnað.
