Fundurinn fór fram í Ráðhúsi Reykjavíkur í dag en undanfari hans eru tvær tillögur sem samþykktar voru í borgarráði í september. Annars vegar um að leggja fram tillögur sem miða að því að bæta námsárangur í lesskilningi, stærðfræði og vísindalæsi og hins vegar að þessum fundi og að eiga opið og beint samtal við kennara og starfsfólk í leik- og grunnskólum um sókn í menntamálum.
Vísir var með beina útsendingu frá fundinum og var meðal annars rætt við Björgu Magnúsdóttur, oddvita Viðreisnar, í upphafi hans en hún á frumkvæði að honum og hefur komið að skipulagningu.
„Þú finnur strauminn hér í salnum en þetta gengur út á að kalla saman hagaðila. Við erum með fullt af flottum kennurum, starfsfólki og stjórnendum í frístundaheimilunum, leikskólunum og grunnskólunum okkar. Við erum líka með foreldra og við í pólitíkinni fáum að taka þátt,“ sagði Björg í viðtali fyrir fundinn.
„Við viljum tala um áskoranir, tækifærin og um lausnirnar því við brennum öll fyrir menntamálum og vitum hvað málaflokkurinn skiptir miklu máli. Orð eru til alls fyrst en ég held að við förum með gott nesti af stað inn í daginn.“
Björg viðurkenndi að það væru háleit markmið að koma skóla- og frístundastarfi í borginni í fremstu röð.
„Það gerir enginn neitt einn þegar kemur að svona stóru verkefni. Við lögðum áherslu á gott og öflugt samtal, hvert einasta orð sem verður sagt hér skiptir máli. Starfsfólk frá borginni er á borðunum og við tökum þetta efni fundarins síðan með okkur inn í sóknaráætlun í menntamálum sem við erum að smíða,“ sagði hún en þátttakendum á fundinum var skipt upp í nokkra hópa og ræddu þeir málefni eins og aukinn árangur í læsi, stærðfræði og vísindum, íslensku sem annað mál, snemmtæka íhlutun og starfsþróun svo eitthvað sé nefnt.
Skera niður í miðlægri stjórnsýslu til að eiga pening í verkefnin sem blasi við
Í myndbandi á samfélagsmiðlum, sem birtist í gær, gagnrýndi Sanna Magdalena Mörtudóttir áherslur meirihlutans og sagði að á sama tíma og verið væri að skipuleggja þennan fund stæði fyrir dyrum óútfærð hagræðingarkrafa borgarfulltrúa meirihlutans á skóla- og frístundasvið upp á tæpan milljarð króna.
Þá hafa uppsagnir hjá borginni verið í brennidepli, sem meðal annars hafa beinst að starfsfólki þess sviðs, og Sanna spyr í myndbandinu hvernig eigi að bæta skóla- og frístundastarf með niðurskurði.
„Það er auðvitað mikið að gera á stóru heimili, við erum stærsta sveitarfélag landsins. Það eru rosalega mörg verkefni og á þessum tíma erum við að vinna fjárhagsáætlun og reyna að finna leiðir til að koma okkur inn í ramma, það er ekkert óvenjulegt við það. Það sem meirihlutinn er að gera er að setja skólastarfið í forgang, við erum að setja viðhald í skólabyggingum í forgang og draga saman í miðlægri stjórnsýslu til þess að eiga peninga og svigrúm til að fara í þau verkefni sem blasa við,“ sagði Björg.
„Það þarf einhvern til að kalla fólk til verka“
Magnús Þór Jónsson, formaður Kennarasambands Íslands, sat fundinn sömuleiðis og sagði gleðilegt að ræða skólamál. Sérstaklega þegar umræðan færi á dýptina en fjallaði ekki endilega um þau mál sem væru oft á yfirborðinu, hvort sem það væru einkunnir eða eitthvað annað.
„Ég vona að það sé dagurinn í dag sem Reykjavíkurborg er að boða til, gott innlegg í það sem við höfum verið að kalla eftir sem er að setjast niður sem samfélag og rýna í hvað við viljum fá út úr skólakerfinu okkar,“ sagði Magnús í viðtali áður en fundurinn hófst.
Hann sagðist ánægður með framtakið og ítrekaði að menntastefna Reykjavíkur, sem samþykkt var árið 2020, væri lifandi skjal.
„Það þarf einhvern til að kalla fólk til verka og búa til samtöl um það sem skiptir máli. Útgjöld til fræðslumála eru rúmlega 50 prósent af útgjöldum sveitarfélaganna og það eru 60-70 þúsund börn í leik- og grunnskólunum okkar. Þetta er snertiflötur margra og verkefnið er mikilvægt.“
Komin inn fyrir fitulagið og inn að beinagrind
Hann viðurkenndi að hann hefði áhyggjur af niðurskurði í málaflokknum.
„Það er alveg samfelld saga frá hruni hjá sveitarfélögum heilt yfir, við höfum ekki tekið Reykjavík út sérstaklega. Það kom svaka högg á kerfin okkar þegar efnahagshrunið varð og það var skiljanlegt þá, en okkur hefur gengið illa að vinna það fjármagn til baka. Það er augljóst að það snýst meðal annars um hvernig skólakerfið virkar, hvaða fjármagn við setjum í það til að koma til móts við þær þarfir sem væntanlega verða settar fram hér í dag.“
Hann segist alltaf vera til í betri nýtingu fjármagns en segir að hægt sé að grípa í alla frasa um að ekki sé hægt að kreista tár úr steini og svo framvegis.
„Við höfum áhyggjur af því að í mörgum málum séum við komin langt úr einhverju fitulagi og alveg niður í beinagrind. Það skiptir máli að standa ekki bara vörð um heldur bæta í. Vonandi hefur Reykjavíkurborg kjark til að ef slíkir bitar koma upp á borðið að menn átti sig á að það er þjóðhagslega hagkvæmt að koma til móts við að gera þetta kerfi vel úr garði því það mun koma okkur til gagns þegar fram líða stundir. Ég hika ekki við að segja að það þarf klárlega að styrkja ákveðnar undirstöður í kerfinu sem kalla á fjármagn.“
„Þetta verða bara orð á blaði nema þú fáir fólkið sem er að vinna vinnuna með“
Fjármálin voru einnig ofarlega í huga Eyglóar Friðriksdóttur, formanns Félags skólastjórnenda í Reykjavík, sem mætti einnig í viðtal áður en fundurinn hófst.
„Ég vona að það verði metnaðarfull áform sem koma út úr þessum degi og að þeir sem ráða í Reykjavík setji fjármagn og krafta í að framkvæma góða hluti fyrir skólastarfið í borginni,“ sagði Eygló í viðtali við Vísi.
Hún sagði gott og eðlilegt að fara í samráð líkt og á fundinum í dag. Þegar komi að því að framkvæma og taka skref til bætingar þurfi að gera það með skólastjórnendum og kennurum.
„Þetta verða bara orð á blaði nema þú fáir fólkið sem er að vinna vinnuna með, það er aðallykillinn í öllum rannsóknum um skólaþróun. Bæði þá sem eru að stjórna skólunum og að kenna, að fá þá til að vilja og langa í vegferð saman,“ sagði Eygló að lokum.