„Það liggur fyrir að það þurfi að gera það. Það yrði ekki þess virði að fara að gera það upp,“ segir Steinþór Einarsson, sviðsstjóri menningar- og íþróttasviðs Reykjavíkurborgar, um fyrirhugað niðurrif á stúkunni í Laugardalslaug.
Það lá fyrir í sumar að rífa þyrfti stúkuna í Laugardalslaug eftir að áhættumat leiddi í ljós að ástand stúku Laugardalslaugar er afar slæmt. Fimm heitum pottum, eimbaði og tveimur sérklefum við stúkuna var snarlega lokað og eru þeir enn lokaðir.
Aðsókn í Laugardalslaugina hefur fengið að gjalda fyrir lokunina. Í júlí var tekjuáætlun í laugina tæplega átján milljónum króna undir áætlun. Þar kom einnig fram að mögulega þyrfti að loka lauginni alfarið nema fyrir skólasund og sundæfingar.
Steinþór segir að ekki sé búið að taka endanlega ákvörðun um hvenær verði ráðist í það að rífa stúkuna en það sé í vinnslu þessar vikurnar. Hluti af þessari vinnu er að ákveða hvað komi í stað stúkunnar sem er eitt kennileita Laugardalsins.
„Öryggisins vegna er ekki hægt að opna þessa potta,“ segir Steinþór.
„Það liggur fyrir skýrsla um með hvaða hætti er hægt að gera þetta en auðvitað tekur þetta allt sinn tíma og það þarf að gera enn meiri ráðstafanir.“
Aðspurður hvort það þurfi mögulega að loka Laugardalslaug á meðan framkvæmdirnar standa yfir segir Steinþór að mögulega verði einhverjar lokanir.
UNESCO-viðurkenning hvatningin
Í nóvember réðist Reykjavíkurborg einnig í sérstakar þrívíddar- og drónamyndatökur í bæði Laugardalslaug og Breiðholtslaug. Í tilkynningu á síðu Reykjavíkurborgar segir að tilgangurinn sé að fá nákvæma og samræmda mynd af ástandi mannvirkjanna svo hægt verði að sinna viðhaldi með markvissum hætti.
„Við fengum þessa UNESCO-viðurkenningu, eða íslenska sundmenningin, og það er hvatning til að hlúa að okkar innviðum í laugunum,“ segir Steinþór.
Hann segir að myndatakan sé byrjun á úttekt borgarinnar á ástandi sundlauga borgarinnar. Í byrjun árs hafi verið skipaður starfshópur sem lagði til faglega úttekt á ástandi lauganna, hvaða viðhald þurfi og endurbætur.
„Það sem við viljum setja í góðan farveg núna er að fá þessa betri yfirsýn og langtímaáætlun um það hvað við þurfum að gera,“ segir Steinþór.
„Við erum að nýta nútímatækni til þess að vera skrefi á undan.“
Myndatökurnar fóru fram 7. og 14. nóvember í Breiðholtslaug og 8. og 15. nóvember í Laugardalslaug. Vegna persónuverndarsjónarmiða var laugunum lokað í um það bil tvær klukkustundir.