„Við erum virkilega stolt af árangrinum okkar og það er rosalega gaman að fá að afhenda svona félagi svona upphæð,“ segir Elvar Jónsson, liðsstjóri Team Rynkeby.
Söfnunin stendur yfir nær allt árið. Nýtt lið er valið á haustin og þá hefst bæði æfingatímabilið og fjáröflunin.
Stór hluti fjárins kemur frá fyrirtækjum sem kaupa pláss fyrir merki sín á hjólabúningum liðsins. Þá stendur hópurinn fyrir ýmsum viðburðum yfir árið og rennur allt sem safnast til Umhyggju.
Yfir 50 á hitamælinum
Hápunktur verkefnisins er síðan hjólaferðin sjálf. Liðið hjólar frá Danmörku til Parísar, um 1.300 kílómetra á einni viku. Elvar segir hjóladagana jafnan vera átta til tíu klukkustunda langa.
„Þetta er mjög mikið álag,“ segir hann.
Ferðin í ár gekk að hans sögn nánast fullkomlega og engin slys urðu á leiðinni. Síðustu dagana þurfti hópurinn þó að glíma við mikla hitabylgju.
„Hitamælarnir okkar voru að fara yfir 50 gráður en svona opinberi hitinn var að fara yfir 40,“ segir Elvar.
Hópurinn brást við hitanum með því að drekka mikið og leggja fyrr af stað á morgnana til að forðast heitasta hluta dagsins.
Skilaboðin að heiman hjálpa
Á leiðinni fá hjólreiðamennirnir sérstök umslög með hvatningarskilaboðum frá langveikum börnum og foreldrum þeirra. Elvar segir þau skipta miklu þegar þreytan fer að segja til sín.
„Eftir tvo, þrjá daga þá er þetta orðið erfitt og þá að geta sest upp í rúm og lesið skilaboð að heiman, það hjálpar manni alltaf.“
Skilaboðin séu frá börnunum og fjölskyldum þeirra sem söfnunin er ætluð að styðja.
„Þetta eru svona hvatningarskilaboð og þau virka.“
„Þarna er maður að uppskera“
Elvar hefur sjálfur tekið þátt í verkefninu níu sinnum. Þótt hann segist hafa mikið gaman af hjólreiðunum og ferðalaginu sjálfu sé afhending söfnunarfjárins hápunktur ársins.
„Það gefur manni virkilega gott í hjartað. Ég hef mjög gaman af því að hjóla og ég hef gaman af því að vera í ferðalaginu en þetta er svona hápunktur ársins hjá mér. Þarna er maður að uppskera.“
Við afhendinguna gáfu þeir Ísleifi Inga Ævarssyni, sem greindist með eitilfrumukrabbamein í september á síðasta ári, sérstaka hjólatreyju.
Elvar segir verkefnið ekki mögulegt án þeirra fjölmörgu sem leggi hönd á plóg.
„Mig langar bara til þess að þakka öllum sem tóku þátt í þessu ferðalagi og öllum styrktaraðilunum sem gerðu okkur kleift að afhenda Umhyggju allt söfnunarféð.“
