Fram kom í fréttum í gær að lokaeinkunnir í stærðfræði og íslensku eru jafnan mun hærri í grunnskólum á höfuðborgarsvæðinu. „Þeir þættir sem hafa mest áhrif hafa á námsárangur er félagslegur bakgrunnur og auðvitað bara skólasókn,“ segir Magnús Þór. „Mögulega þurfum við að horfa til þess líka hvernig okkur gengur að manna skólana okkar fagfólki.“
Hann bendir á að hlutfall fagmenntaðra kennara utan höfuðborgarsvæðisins og ákveðinna þéttbýliskjarna hefur í gegnum söguna verið minna.
En segir þetta eitthvað um gæði námsins eða er þetta merki um einkunna verðbólgu á höfuðborgarsvæðinu? „Ég held að það sé alls ekki þannig,“ segir Magnús Þór. „Matsviðmiðin snúast um það að börnin og nemendurnir okkar fái rétta mynd og kennararnir sem meta þau eru þeir sem hitta þau alla daga og bera hag þeirra mest fyrir brjósti.“
Nánast allir nemendur fengu vist í skóla sem þeir vildu
5.152 nemendur á landsvísu fengu samþykkta umsókn um framhaldsskóla í haust, og hafa aldrei verið fleiri. 79% nemenda fengu skólavist í þeim framhaldsskóla sem þeir vildu helst komast í, 12% fengu pláss í þeim skóla sem þeir settu sem annað val og 6% fengu sitt þriðja val. Alls fengu því 97% nemenda skólavist í einum af þeim þremur skólum sem þeir völdu sjálfir. Þremur prósentum, eða 158 nemendum, var úthlutað pláss í öðrum skóla.
Mennta- og barnamálaráðuneytið ætlar að gera breytingar á námsmati grunnskóla þannig að það verði sett fram með tölum en ekki bókstöfum. „Okkur finnst þetta ekki snúast um bókstafi eða tölustafi heldur það að við séum með matsviðmið sem byggja á námskránni,“ segir Magnús Þór. Taka þurfi tillit til ólíkrar hæfni barna. „Ég held að það sé lykillinn að þessu öllu og börnunum fyrir bestu að það verði samráð og samtal milli ráðuneytis, milli foreldrahópa sem hafa verið að ræða þetta, og fólksins sem sér um námsmatið,“ segir Magnús Þór.
„Stóra verkefnið er samt alltaf þetta; að við séum þetta með námsmat sem tekur tillit til barnanna sem við erum að meta og þeirrar námskrár sem við horfum til.“
