Fyrirtækið Fagkaup hefur keypt 30 prósenta hlut Daníels Sigurðssonar í kranafyrirtækinu DS Lausnum. Þetta kranafyrirtæki hefur verið til umfjöllunar í fjölmiðlum nú í ágúst vegna þess að fyrrverandi eigandi fyrirtækisins, Daníel Sigurðsson, seldi meirihlutann í því til Fagkaupa í fyrra. Daníel greiddi 932 milljónir í fjármagnstekjuskatt í fyrra og var því með fjármagnstekjur upp á 4,3 milljarða króna.
Í tölvupósti til fréttastofu RÚV segir Bogi Þór Siguroddsson, annar af eigendum Fagkaupa, að nú í sumar hafi Fagkaup svo keypt eftirstandandi 30 prósenta hlut í kranafyrirtækinu af Daníel Sigurðssyni. Fagkaup á því í dag 100 prósenta hlut í þessu fyrirtæki. Fréttastofa spurði Boga um viðskiptin við Daníel og bað um viðtal um þau sem Bogi afþakkaði. „Þetta eru opinberar upplýsingar og ég get auk þess upplýst þig um að Fagkaup á nú DS Lausnir að fullu eftir kaup þess á þeim 30% sem út af stóðu, núna í sumar,“ segir Bogi í póstinum.
Miðað við fjármagnstekjurnar sem Daníel greiddi í fyrra gæti 70 prósenta hlutur hans í DS Lausnum hafa verið seldur á um fjóra milljarða króna. Þessi 30 prósenta hlutur sem eftir stóð gæti hafa verið seldur fyrir um 1,5 til 1,8 milljarða króna miðað við kaupverð á meirihlutanum í fyrirtækinu. Heildarkaupverðið á DS Lausnum gæti því hafa numið um 5,5 til allt að 6 milljörðum króna.
Fjallað er um þessi viðskipti og uppgang fyrirtækisins Fagkaupa í fréttaskýringaþættinum Þetta helst. Þáttinn má hlusta á hér:
Stórveldi með ellefu dótturfélög
Þegar litið er á ársreikning DS Lausna fyrir árin 2024 og 2025 er ekki einkennilegt að fyrirtæki eins og Fagkaup hafi haft áhuga á því.
Árið 2024 var þetta kranafyrirtæki með 2,3 milljarða króna tekjur og rúmlega 600 milljóna króna hagnað. Þetta er hagnaðarhlutfall upp á 26 prósent sem er mjög hátt í viðskiptum.
Tölurnar fyrir síðasta ár voru svipaðar en þá var kranafyrirtækið með 2,5 milljarða króna tekjur og rúmlega 580 milljóna króna hagnað. Þetta er hagnaðarhlutfall upp á rúmlega 23 prósent sem er einnig mjög hátt.
Með kaupunum á DS Lausnum bætist þetta fyrirtæki við nokkur önnur fyrirtæki sem Fagkaup á sem sérhæfa sig flest í einhvers konar þjónustu við iðnað og byggingu fasteigna. Fagkaup á rafverktakafyrirtækið Johann Rönning, verkfærafyrirtækið Sindra, pípulagnafyrirtækið Vatn og Veitur og Áltak sem sérhæfir sig í klæðningum utan á hús svo aðeins nokkur dótturfélög séu nefnd.
Bogi á Fagkaup til jafns á móti eiginkonu sinni, Lindu Björk Ólafsdóttur.
Fagkaup á samtals ellefu dótturfélög sem öll vinna á þessu sviði. Þetta eru fyrirtæki sem sérhæfa sig fyrst og fremst í því að selja vörur og þjónustu til annarra fyrirtækja. Slík fyrirtæki kallast á ensku B2B eða bissness to bissness-fyrirtæki. Fyrirtæki sem selja vörur og þjónustu beint til almennings kallast á hinn bóginn B2C eða bissness to consumer á ensku.
Í fyrra var þetta fyrirtækjaveldi Boga og Lindu með samtals rúmlega 27 milljarða króna tekjur og hagnað upp á 870 milljónir króna. Þá unnu samtals 300 manns hjá fyrirtækjum Fagkaupa.
Ríflega 20 ára saga sem hófst eftir deilur um Húsasmiðjuna
Segja má að þessi uppgangur Boga og Lindu með Fagkaup hafi byrjað árið 2003 þegar þau keyptu Johann Rönning. Síðastliðin tuttugu ár hafa þau hægt og bítandi byggt upp þetta fyrirtækjaveldi á iðn- og byggingamarkaði á Íslandi. Á þessum tíma hafa þau, þrátt fyrir þetta, afar lítið verið í sviðsljósi fjölmiðla.
Áður en þau keyptu Johann Rönning var Bogi hins vegar talsvert til umfjöllunar í fjölmiðlum.
Árið 2002 gaf hann út bók um það hvernig hann taldi að hann hefði verið svikinn í viðskiptum með byggingaverslunina Húsasmiðjuna. Bókin hét Fjandsamleg yfirtaka – átakasaga úr íslensku atvinnulífi. Hún vakti mikla athygli og var fjallað um hana víða í fjölmiðlum. Bókin heyrði líka til tíðinda þar sem slíkar uppgjörsbækur manna í viðskiptalífinu voru ekki algengar á þeim tíma og hafa aldrei verið.
Þetta helst óskað eftir viðtali við Boga Þór Siguroddsson um viðskiptin með kranafyrirtækið DS Lausnir og fyrirtæki hans og Lindu. Líkt og áður sagði hér að framan afþakkaði hann viðtal að þessu sinni.
