Logi Sigurðsson, sauðfjárbóndi og umhverfisfulltrúi í Borgarbyggð, ætlar að kjósa já í þjóðaratkvæðagreiðslunni á laugardag. Hann segir að Íslendingar verði aldrei almennilega klárir á því hvort aðild að Evrópusambandinu henti íslenskum landbúnaði fyrr en búið sé að kanna hvað sé í boði við samningaborðið.
Hann telur einnig að Ísland þurfi að losna við íslensku krónuna til að bæta lánakjör og skapa stöðugra efnahagsumhverfi.
„Ég held að við verðum aldrei klár um þetta fyrr en við sjáum hvað er í boði. Auðvitað horfi ég til landbúnaðarins því ég starfa í landbúnaði og ég leyfi mér að efast um að það sé allt hræðilegt við landbúnað í Evrópusambandinu,“ segir Logi.
Hann óttast ekki að íslenskur landbúnaður yrði undir við aðild og bendir á að íslenskur landbúnaður hafi ákveðna sérstöðu. Fyrir honum snýst málið því fyrst og fremst um að kanna möguleikana áður en afstaða er tekin til sjálfrar aðildarinnar.
Rætt við fólk sem ætlar að kjósa já
Þjóðaratkvæðagreiðsla um aðildarviðræður við Evrópusambandið fer fram um helgina. Kastljós ræddi í kvöld við fólk sem ætlar að kjósa já við því að Ísland hefji á ný aðildarviðræður. Í gær var rætt við fólk sem hyggst kjósa nei.
Meðal viðmælenda voru Magnús Árni Skjöld, formaður Evrópuhreyfingarinnar, Gréta María Grétarsdóttir, ráðgjafi og fyrrverandi forstjóri Prís og Heimkaupa, Hjálmar Vilhjálmsson, yfirmaður uppsjávarsviðs og aðstoðarmaður forstjóra hjá sjávarútvegsfyrirtækinu Brim, og Kristrún Ágústsdóttir, nemandi við Háskóla Íslands.
Magnús Árni segir að Evrópusamstarf snúist ekki um að gefa eftir fullveldi heldur um að tryggja að Ísland hafi áhrif á ákvarðanir sem hafa áhrif á landið.
„Sem fullveldissinni tel ég að Ísland eigi að standa vörð um fullveldi sitt með því að sitja við borðin þar sem ákvarðanirnar um álfuna okkar eru teknar,“ segir hann.
Hann telur einnig að breytt öryggisumhverfi geri samstarf við Evrópuríkin mikilvægara. Herlaus þjóð þurfi öfluga vini og samstaða ríkja sem deila sömu gildum geti skipt máli þegar kemur að fjölþátta ógnum og viðskiptastríðum.
Lægri vextir einn helsti mögulegi ávinningur af aðild
Efnahagsleg rök eru einnig áberandi hjá já-hliðinni. Gréta María Grétarsdóttir telur að ákvarðanir um framtíð Íslands eigi að byggjast á gögnum og segir lægri vexti einn helsta mögulegan ávinning af aðild og upptöku evru.
„Það mun gagnast bæði fyrirtækjum og heimilum og við höfum séð það að þau lönd sem hafa farið inn í Evrópusambandið að þar hafa vextir lækkað,“ segir hún.
Hún bendir á smæð íslenska hagkerfisins og álagið sem fylgi krónunni. „Það eru ekki fyrirtæki sem eru að taka þetta á kassann, sjaldnast, heldur er það sá sem fer út í búð og stendur á kassanum sem þarf að borga.“
Þóroddur Bjarnason, prófessor í félagsfræði og sérfræðingur í byggðaþróun, tekur ekki afstöðu. Hann telur hægt að halda áfram með kvótakerfið og byggðakvóta innan ESB en reglurnar yrðu að gilda jafnt um Íslendinga og aðra Evrópubúa.
Einnig var rætt við Þórodd í Kastljósi gærdagsins, þar sem viðmælendur gerðu grein fyrir því hvers vegna þeir ætli að kjósa nei.
