Samtök Pauls Watson skipstjóra gefa lítið fyrir ásakanir Kristjáns Loftssonar gegn Matvælastofnun um að stofnunin hafi komið samtökunum á slóð hvalveiðiskipanna. Samtökin segjast hafa fylgst með ferðum hvalveiðiskipanna frá landi allt frá 2018, og með leiguskipi sem fylgdist með skipinu sjónrænt og með ratsjá á meðan á hvalveiðivertíðinni stóð sumarið 2022.
Þetta kemur fram í yfirlýsingu frá breska armi samtökanna, Captain Paul Watson Foundation UK (CPWF UK), sem standa að baki aðgerðum skipsins Bandero.
Þar segir að þrátt fyrir að Hvalur 8 og 9 hafi haft slökkt á staðsetningarbúnaði í áraraðir hafi samtökin fylgst með ferðum þeirra með öðrum leiðum.
„Upplýsingar CPWF UK frá síðustu þremur leiðöngrum eru nægar til þess að leiða Bandero á svæðin þar sem hvalskipin finna fórnarlömb sín á mismunandi tímum veiðitímabilsins,“ segir í yfirlýsingu samtakanna.
Samtökin segja að viðbrögð Kristjáns sýni bersýnilega að aðgerðir Bandero séu þegar farnar að bera árangur, þrátt fyrir aðgerðir Landhelgisgæslunnar.
„Á innan við viku hafa þær þau áhrif með því að beina hvalveiðum frá helstu veiðistöðum, sem lengir hvalveiðitúrana og leiðir til þess að færri hvalir eru drepnir.“
Þá segir í yfirlýsingunni að þau gruni að ásakanir Kristjáns séu undanfari enn einnar bótakröfunnar á hendur íslenska ríkinu í tilraun til þess að bæta upp fjárhagstap hvalveiðivertíðarinnar.
„Annað hvort það eða að þetta er örvæntingarfull tilraun til að beina athyglinni frá kynferðislegum uppátækjum í hvalstöðinni,“ segir í yfirlýsingunni, og vísað er til athæfis starfsmanns Hvals í síðustu viku þar sem hann veifaði typpi dauðs hvals í átt að tökumanni Sýnar.
Samtök Pauls Watson skipstjóra hvetja yfirvöld til að fella hvalveiðileyfi Hvals úr gildi í ljósi þess sem þau segja brot á lögum um dýravelferð og mengun.
