Jakob Ingi Ragnarsson gerir alvarlegar athugasemdir við fréttaflutning af máli hunds í Hafnarfirði en hann er maðurinn sem hefur verið sakaður um að neita að skila hundinum Mosa til réttmætra eigenda. Hann segist þvert á móti vera réttmætur eigandi hundsins og það sé ekki rétt að hann hafi afsalað sér Mosa en neiti nú að skila honum úr tímabundinni pössun.
DV hefur fjallað um málið síðustu daga, en Óðinn Örn Eybekk Baldvinsson er samkvæmt örmerkjaskráningu í gagnagrunninum Dýraauðkenni skráður eigandi Mosa.
Jakob segist hafa borist hótanir í kjölfar fréttar DV af málinu fyrr í dag en hann var þó ekki nafngreindur í fréttinni. Í samtali við DV segir hann að með hjálp samfélagsmiðla hafi fólk komist að því hver hann er.
Jakob segir að í kjölfar deilna milli hans og barnsmóður hans, eftir að þau slitu samvistum, hafi hún skráð hundinn yfir á Óðinn og sjái nú eftir því. Jakob sendi DV skjáskot af skilaboðum þeirra á milli sem hann segir að sanni mál sitt, en í skilaboðunum segir hún Jakobi að segja lögfræðingi að það hafi verið mistök, í fljótfærni vegna skilnaðar þeirra, að breyta skráningu hundsins með þessum hætti.
Örmerki
Jakob segir að örmerkjaskráning sé fyrst og fremst hugsuð til að auðvelda það að bregðast við þegar dýr týnist en snúist síður um eigendaskráningu.
Í reglugerð um velferð gæludýra segir að örmerki skuli skráð í miðlægan gagnagrunn sem sé samþykktur eða rekinn af Matvælastofnun. Umráðamanni beri að tryggja að upplýsingarnar þar séu réttar á hverjum tíma. Umráðamaður beri allan kostnað af merkingu og skráningu dýra sinna.
Eini íslenski gagnagrunnurinn sem þetta á við um er Dýraauðkenni.is sem rekinn er af félagi í eigu Dýralæknafélags Íslands. Í notendaskilmálum Dýraauðkennis segir að á vefsíðunni geti dýralæknar skráð ný gæludýr í gagnagrunninn og flett upp örmerkjum og einstaklingsmerkjum gæludýra, auk þess sem eigendur gæludýra geti uppfært upplýsingar um gæludýr sín, framkvæmt eigendaskipti og sett inn myndir. Dýralæknar hafi einir heimild til að nýskrá gæludýr undir örmerkjanúmeri eða einstaklingsmerki í gagnagrunninn. Til þess að hægt sé að breyta skráningu á umráðamönnum gæludýra þurfi skráður umráðamaður að samþykkja slíka breytingu, eða viðeigandi stjórnvald komi til umráðasviptingar.
Ber ekki saman
Jakob hefur aðra sögu að segja en Óðinn af því hvernig það kom til að sá fyrrnefndi tók við Mosa. Það sé rétt að hann og barnsmóðir hans hafi tekið Mosa til sín undir lok árs 2022 en það sé ekki rétt að þau hafi sent hann til baka á síðasta ári til varanlegrar dvalar hjá Óðni og fjölskyldu, í kjölfar skilnaðar Jakobs og barnsmóður hans. Það hafi átt að vera tímabundið þar sem þau hafi verið að stefna á flutninga til Danmerkur en ekkert hafi síðan orðið af þeim.
Samkvæmt ódagsettu skjáskoti af samfélagsmiðlum auglýsti fjölskyldan Mosa til sölu eða til gjafar með yfirlýsingu um áhuga á að passa hann ef þess þyrfti.
Jakob segir að eftir að ljóst hafi orðið að ekkert yrði af flutningunum til Danmerkur og hann og barnsmóðir hans slitið samvistum hafi hann í kjölfarið verið beðinn um að taka Mosa aftur sem hann hafi samþykkt og fengið þakkir fyrir. Hins vegar hafi nú komið krafa um að fá Mosa til baka í kjölfar skilaboða frá barnsmóður hans sem séu ekki sannleikanum samkvæm. Það hafi verið gert með töluverðum ofsa og ýmsar fullyrðingar sem settar hafi verið fram sem ekki eiga við rök að styðjast, að hans sögn.
