Snorri Másson, varaformaður Miðflokksins, gagnrýnir stjórnvöld harðlega fyrir það sem hann segir vera rangfærslur í kynningu á nýrri skýrslu sérfræðingahóps um íslenskt efnahagskerfi og gjaldmiðlamál. Hann segir að stjórnvöld hafi sett fram niðurstöðu sem sé hvergi að finna í sjálfri skýrslunni og varar við því að slíkt grafi undan trausti almennings.
Snorri segir að stjórnmálamenn tali gjarnan um hættuna af svokallaðri upplýsingaóreiðu á samfélagsmiðlum en að raunverulegt vandamál sé oft upplýsingagjöf stjórnvalda sjálfra.
„Sjálfur tel ég að málfrelsi almennings á samfélagsmiðlum sé ekki stóra vandamálið, heldur hef ég stundum sagt að stjórnmálamennirnir sjálfir, eða ríkisvaldið, sé mun heldur ein stærsta uppspretta upplýsingaóreiðu í okkar samfélagi,“ skrifar hann.
Segir niðurstöðu ekki að finna í skýrslunni
Gagnrýni Snorra beinist að framsetningu á vef Stjórnarráðsins þar sem sagt er að ný skýrsla sérfræðingahóps um gjaldmiðlamál hafi komist að þeirri niðurstöðu að kostnaður af krónunni sé líklega meiri en ábatinn.
Að sögn Snorra er slík niðurstaða hvergi að finna í skýrslunni sjálfri. Hann vísar meðal annars til umfjöllunar Jóns Helga Egilssonar hagfræðings í Morgunblaðinu þar sem bent sé á sama atriði.
Snorri segir að fjölmiðlar hafi eðlilega byggt fréttaflutning sinn á upplýsingum frá Stjórnarráðinu og því hafi þessi meinta niðurstaða farið víða þrátt fyrir að hún sé ekki í skýrslunni.
Vísar til ummæla formanns hópsins
Í færslunni bendir Snorri einnig á að formaður sérfræðingahópsins hafi tekið af allan vafa þegar hún sagði í gær að það hafi alls ekki verið fyrirmæli hópsins að komast að niðurstöðu með eða á móti ákveðinni stefnu í gjaldmiðlamálum.
Að mati Snorra sýni það að framsetning stjórnvalda sé misvísandi og að metnaður þeirra til að sannfæra almenning um Evrópumál breyti engu um staðreyndir málsins.
Kallar eftir skýringum ráðherra
Snorri segir að fram undan sé mikilvæg ákvörðun í ágúst um framtíð og hagsmuni Íslands. Hann telur mikilvægt að umræðan byggist á réttum upplýsingum.
„Það er hins vegar grátlegt ef ríkisstjórnin hyggst misnota það traust sem almenningur ber til stjórnvalda í trausti þess að fæstir geta lagt það á sig að lesa 220 blaðsíðna skýrslur á ensku um gjaldmiðla og efnahagsmál,“ skrifar hann.
Það er hvimleiður ávani stjórnmálamanna, þar á meðal íslenskra, að lýsa við vel valin tilefni áhyggjum af svonefndri upplýsingaóreiðu, til dæmis á „óritstýrðum samfélagsmiðlum“.
Áhugi þeirra á að koma böndum á slíka umræðu snýst þó yfirleitt ekki um að upplýsingarnar í… pic.twitter.com/xi9NsHNr1v
— Snorri Másson (@5norri) June 3, 2026
