Donald Trump Bandaríkjaforseti segir að áhyggjur um að gervigreind geti tortímt mannkyni séu þvættingur og samsæri og hafnar tillögum um að hægja á þróun hennar.
Í röð færslna á Truth Social segir hann meðal annars að áhyggjuraddir innan úr gervigreindarheiminum séu samsæri landráðamanna og svikara.
Undanfarið hafa yfirlýsingar bæði fyrrverandi starfsmanna stærstu gervigreindarfyrirtækja heims og hæstráðenda þessara sömu fyrirtækja valdið titringi innan þessa ört vaxandi geira.
Fyrir nokkrum dögum sagði fyrrverandi starfsmaður hins bandaríska Anthropic, sem á og rekur gervigreindarforritið Claude og milljónir nota daglega, að hann teldi að minnsta kosti 10% líkur á að gervigreind tortími mannkyni innan áratugar.
Á laugardag birti Dario Almodei, forstjóri og annar stofnenda Anthropic grein, þar sem hann segir rétt að setja hömlur á þróun gervigreindar og hægja þarmeð á henni. Það væri skoðun sem hann hefði ekki haft árið 2023 þegar hugmyndir um slíkt hefðu fyrst komið fram. Nú væri þróunin hins vegar orðin svo hröð að réttast væri að taka í bremsuna.
Undir þetta tóku Sam Altman, forstjói OpenAI, og Elon Musk, eigandi gervigreindarforritsins Grok, tveir af risunum í þessum geira vestanhafs.
Gísli Ragnar Guðmundsson, sérfræðingur í gervigreind hjá Almannarómi, segir við fréttastofu að Trump vilji halda þróun gervigreindar áfram óheftri til þess að bíða ekki lægri hlut í gervigreindarkapphlaupi á heimsvísu, þar sem almennt er talið að Kínverjar narti í hæla Bandaríkjamanna. Hann nefnir þó í því skyni að oft hafi Bandaríkjastjórn sett þróun gervigreindar miklar skorður og þá eftir eigin hentisemi. Gísli tekur dæmi um það þegar Anthropic setti nýtt gervigreindarmódel á markað en Bandaríkjastjórn bannaði öllum nema bandarískum ríkisborgurum að nota það. Jafnvel starfsmenn fyrirtækisins, sem voru ekki bandarískir, máttu þannig ekki nota forritið. Það sé því ljóst að Trump vilji halda þróun gervigreindar áfram á fullu gasi en þó á sínum eigin forsendum.
„Það er hagur beggja þjóða að hægja á sér, en hagsmunir hvorrar þjóðar fyrir sig er svolítið líka að flýta og reyna að vera fyrstur. Þannig til þess að þau fari að hægja á sér þarf að tryggja að allir hægi á sér á sama tíma,“ segir Gísli og bendir á að þar vandist málið. Það sé lítið mál að setja þróun gervigreindar skorður, en tryggja þurfi að allir hægi á henni á sama tíma og á sama hátt.
Einu skorðurnar sem Trump segir að verði að setja á þróun gervigreindar séu sterkur Bandaríkjaforseti með háa greindarvísitölu og vísar þar til síns sjálfs.
