Sonja Ýr Þorbergsdóttir, formaður BSRB, segir áform núverandi ríkisstjórnar valda sér og öðrum innan verkalýðshreyfingarinnar áhyggjum og nefnir hún styttingu tímabils atvinnuleysisbóta og lengingu ávinningstíma sem dæmi. Þá nefnir hún einnig afnám áminningarskyldu ríkisstarfsmanna.
„En það sem er eiginlega hvað verst í þessu er að við höfum almennt verið sammála um það í þessu þríhliða samtali að við viljum byggja ákvarðanir á bestu stöðu þekkingar,“ segir Sonja Ýr í sérstökum umræðuþætti á Rás 1 í tilefni 1. maí, alþjóðlegs baráttudags verkalýðsfólks. Hún vísar þar í þríhliða samtal stjórnvalda, atvinnurekenda og launafólks.
„Núna er verið að taka ákvarðanir án þess að meta áhrifin, án þess að draga fram þekkinguna, án þess að taka samtalið eða samráðið og þá auðvitað verður þetta afleit ákvörðun og afleit áhrif og það hræðir okkur eiginlega hvað mest.“
Halla Gunnarsdóttir, formaður VR, var einnig gestur þáttarins sem hlusta má á í heild sinni hér fyrir neðan.
Skortur á þolinmæði í aðgerðum ríkisstjórnarinnar
Óróatímar eru í íslensku efnahagslífi, verðbólga mælist 5,2% og stýrivextir eru 7,5%. Í nýlegri hagspá Landsbankans til 2026 er gert ráð fyrir að stýrivextir verði hækkaðir upp í 8,25% á þessu ári og verðbólga verði 4,8% á þessi ári.
Mögulegt er að forsenduákvæði kjarasamninga verði virkjað í september og þeir teknir til endurskoðunar.
Einnig var rætt við Kolbrúnu Halldórsdóttur, formann BHM. Hún tekur undir með Sonju að samráðsleysi hafi einkennt ákvarðanir stjórnvalda og að stytting tímabils atvinnuleysisbóta hafi verið misráðin.
Hún minnti á að þegar núverandi stjórn tók við völdum hefði starfshópur innan félagsmálaráðuneytisins unnið að tillögum þvert á stjórnvöld og verkalýðshreyfingu og hefði átt stutt eftir í niðurstöðu.
„Svo kemur ný ríkisstjórn sem hefur ekki þolinmæði til að bíða eftir því að hópurinn skili af sér niðurstöðu heldur veður fram í nafni hagræðingarhóps sem var bara í mínum huga alveg ótrúlega misráðið verktól og þau fara fram með alls konar tillögur og meðal annars þessa í nafni hagræðingar,“ segir Kolbrún sem sér slíkt samráðsleysi sem eina helstu brotalöm ríkisstjórnarinnar.
„Þau koma nýlega inn á vettvanginn, þau ætla að vera stjórn verka, láta verkin tala, þau vaða í að búa til þennan hagræðingarhóp, þar koma fram mjög skringilegar og illa rökstuddar tillögur sem þau virðast vera að nota sem fyrirmynd aðgerða sinna og þetta er hræðilegt,“ segir Kolbrún.
