Utanríkismálanefnd Alþingis kom saman á fundi í morgun að beiðni utanríkisráðherra, meðal annars til að ræða niðurstöðu þjóðaratkvæðagreiðslunnar um helgina, þar sem því var hafnað að halda áfram aðildarviðræðum við Evrópusambandið.
Þingmenn ræddu hvað ætti að gera í framhaldinu.
„Við vorum auðvitað að þrýsta á svör frá utanríkisráðherranum um það hvort það yrði ekki farið af stað í þá vegferð að skýra þessi mál gagnvart Evrópusambandinu sem kom óvænt með þetta útspil um gilda umsókn. Það var ekki afgreitt á þessum fundi en er til skoðunar,“ segir Diljá Mist Einarsdóttir, þingmaður Sjálfstæðisflokksins og annar varaformaður nefndarinnar.
Sigmundur Davíð Gunnlaugsson, formaður Miðflokksins, sagði svör ráðherra á fundinum hafa verið frekar rýr.
„Mér fannst ráðherrann ekki alveg gera sér grein fyrir þeim skilaboðum sem komu frá þjóðinni og jafnvel þvert á móti eins og það lægi í loftinu að nú fengju menn að sjá straum reglugerða. Maður óttast að þær verði þá allar blýfylltar til að sýna fólki að það hefði átt að kjósa öðruvísi. Refsa, refsa Íslendingum. Það er það sem ég óttast.“
Pawel Bartoszek, formaður utanríkismálanefndar og þingmaður Viðreisnar, sagði að málin þyrftu að fara að skýrast.
„Við þurfum að finna einhverja leið til að setja endi á þetta mál. Ég hef rætt við marga úti í samfélaginu undanfarna daga og fáir hafa sagt: Pawel, getum við fundið einhverja leið til að halda þessu máli gangandi eins og hægt er? Ég hef ekki heyrt þau sjónarmið. Ég held að það sé kominn tími til að við setjum þetta mál aftur fyrir okkur og einbeitum okkur að öðrum.“
Verður það gert öðruvísi en að draga umsóknina til baka?
„Það fer aðeins eftir því hvort það sé um það víðtæk sátt eða hvort það kalli á umræður um form og efni. Ef það er þá getur það að einhverju leyti haldið umræðunni áfram.“
Þorgerður Katrín Gunnarsdóttir utanríkisráðherra kom fyrir fundinn.
„Ég undirstrika það að það voru engar ákvarðanir teknar á þessum fundi. Þetta voru fyrst og fremst góð samskipti að mínu mati og náttúrulega skiptar skoðanir. Þetta eru samtöl og samræður sem við þurfum að halda áfram til að átta okkur á hvaða skref er best að taka fyrir Íslands hönd.“
Hún segir að það kunni að vera álitamál hvort draga eigi aðildarumsóknina frá 2008 til baka.
„Mér finnst þýðingarmest núna á þessu stigi að við aðeins öndum, að við áttum okkur á hvernig staða heimsmála er í dag, tökum það inn í myndina og skoðum hvaða leið er best fyrir okkur til að halda uppi góðum samskiptum áfram við Evrópusambandið.“
