Landsréttur hefur staðfest gæsluvarðhaldsúrskurð Héraðsdóms Reykjavíkur yfir manni sem grunaður er um brot í nánu sambandi, þar á meðal ítrekuð brot gegn nálgunarbanni, líkamsárás og hótanir.
Maðurinn fór fram á að úrskurðurinn yrði felldur úr gildi en krafðist til vara að vægari úrræðum yrði beitt. Hann var úrskurðaður í gæsluvarðhald þann 21. ágúst og sætir því til 17. september.
Manninum hefur einnig verið gert að sæta brottvísun úr landi og sjö ára endurkomubanni með úrskurði Útlendingastofnunar í júní. Ákvörðunin hefur verið kærð til kærunefndar útlendingamála en hefur ekki hlotið endanlega afgreiðslu.
Falsaði TikTok-reikning og óskaði konunni þjáningar og dauða
Honum var gert að sæta nálgunarbanni gagnvart konu og börnum hennar tveimur. Fól það meðal annars í sér bann við því að hann kæmi nálægt heimili þeirra, dvalarstöðum, skóla og íþróttahúsi.
Maðurinn er grunaður um að hafa margsinnis brotið gegn nálgunarbanninu, til að mynda með því að hafa fylgst með dóttur brotaþola og og lýst klæðnaði hennar, mætt á íþróttaviðburð sonar hennar, komið að heimili hennar og elt hana á almannafæri þar til lögregla handtók hann að nýju.
Þá á maðurinn að hafa birt myndbönd og myndir af konunni á fölsuðum TikTok-reikningi í hennar nafni, þar á meðal myndband þar sem hann óskaði henni þjáningar og dauða.
Lögregla handtók manninn fyrst eftir að hafa fengið tilkynningu um að kona væri að öskra á hjálp og að karlmaður væri að draga hana nauðuga inn í anddyri húss. Konan lýsti því að maðurinn hefði ráðist á hana fyrir utan heimili hennar, tekið hana kverkataki, fleygt henni í snjóinn og bitið hana í höndina.
Maðurinn þvertók fyrir að þekkja konuna í skýrslutöku og gaf óljósar skýringar á því hvers vegna hann hefði verið á vettvangi.
Tilhæfulausar innheimtukröfur
Í kjölfarið kærði brotaþoli manninn fyrir áframhaldandi áreitni: ítrekaðar hringingar úr leyninúmerum, tölvupósta og skilaboð með hótunum í garð hennar og fjölskyldu hennar.
Þá sagði hún manninn líka hafa sent sér tilhæfulausar innheimtukröfur, samtals að upphæð 951 þúsund krónur, og skráð hana sem greiðanda rafmagnsreiknings fyrir íbúð sem hann leigði.
Maðurinn undirritaði svokallaða Selfossleið þann 17. apríl, þar sem hann skuldbatt sig til að hafa engin samskipti við konuna. Háttsemin á engu að síður að hafa haldið áfram. Konan fór til lögreglu mánuði síðar og sagði manninn hafa sent sér vel yfir 100 tölvupósta auk annarra skilaboða frá því að hann undirritaði skuldbindinguna.
Hann hefði einnig sent henni myndband þar sem ljósmyndir af þeim báðum voru notaðar í sviðsettri bölvunarathöfn með svokölluðum vúdú-dúkkum, hauskúpum og drungalegri tónlist.
Háttsemin beri öll einkenni ofsóknarmynsturs
Að mati lögreglu ber háttsemi mannsins öll einkenni ítrekaðs, viðvarandi og kerfisbundins ofsóknarmynsturs sem hvorki handtökur, undirrituð yfirlýsing né formlegt nálgunarbann hafi stöðvað.
Þá telur lögregla stigvaxandi atvik vikurnar áður en maðurinn var hnepptur í gæsluvarðhald benda til þess að hann muni halda brotum sínum áfram verði hann látinn laus.
Framburður konunnar hafi verið trúverðugur og stöðugur. Maðurinn hafi sjálfur viðurkennt að hafa sagt ósatt við skýrslutöku hjá lögreglu og framburður hans verið breytilegur og ósamrýmanlegur öðrum gögnum málsins. Hann hafi til að mynda neitað að kannast við símanúmer sem kom síðar í ljós að væri í hans notkun.
