„Þetta eru bara gríðarleg vonbrigði. Ég held að þetta séu mistök, ég held að þarna sé fólk að taka ákvarðanir sem skilji ekki fréttir,“ segir Sigríður Dögg Auðunsdóttir, formaður Blaðamannafélags Íslands, um þá ákvörðun stjórnenda Sýnar að hætta með sjónvarpsfréttir.
Sýn greindi frá þessu í tilkynningu til Kauphallar Íslands núna í morgun. Síðasti kvöldfréttatími Sýnar verður í kvöld. Tíðindin hafa vakið mikla umræðu í samfélaginu og sætt gagnrýni.
Með þessu lýkur 40 ára samfelldri sögu kvöldfrétta á Sýn og hjá fyrrirennara Sýnar, Stöð 2. Fyrsti fréttatíminn á Stöð 2 var sendur út þann 9. október árið 1986.
Þessi ákvörðun Sýnar að hætta með sjónvarpsfréttir kemur í kjölfar annarrar ákvörðunar sem er mikilvæg í þessu samhengi.
Fyrir viku var tilkynnt að Sýn myndi ekki selja hluta fjölmiðla sinna til Símans fyrir 5,25 milljarða króna líkt og til stóð. Þá skilaði Sýn einnig árshlutauppgjöri í síðustu viku sem sýndi tap upp á rúman hálfan milljarð króna á fyrstu sex mánuðum ársins.
Fjallað er um þessa ákvörðun stjórnenda Sýnar að hætta með sjónvarpsfréttir sem og viðskiptin fyrirhuguðu við Símann og árshlutauppgjörið í fréttaskýringaþættinum Þetta helst í dag. Þáttinn má hlusta á hér.
Viðskiptin strönduðu á verðinu
En af hverju duttu viðskipti Sýnar við Símann upp fyrir í síðustu viku?
Samkvæmt heimildum fréttastofu leiddi neikvæð niðurstaða áreiðanleikakönnunar sem Síminn lét gera um áætlað raunvirði þessara eigna til þess að ekkert varð af viðskiptunum. Áreiðanleikakönnunin sýndi fram á það að þetta ætlaða 5,25 milljarða kaupverð hafi verið of hátt og vildi Síminn því greiða lægra verð fyrir þessar eignir. Ekki tókst að komast að sameiginlegri niðurstöðu um þetta. Bæði Síminn og Sýn eru almenningshlutafélög sem skráð eru á markað.
Forstjórar þessara tveggja almenningshlutafélaga hafa ekki viljað svara þeirri spurningu fréttastofu hvort viðskiptin hafi strandað á verðmiðanum á eignunum í kjölfar þessarar áreiðanleikakönnunar.
Herdís Dröfn Fjeldsted, forstjóri Sýnar, hefur ekki viljað ræða um ástæður þess að hætt var við viðskiptin við Símann eða Ása. Fréttastofa spurði hana ítrekað sérstaklega út í áreiðanleikakönnunina og þá neikvæðu niðurstöðu sem úr henni kom fyrir Sýn.
Í tölvupósti til fréttastofu segir hún: „Við erum bundin trúnaði er varðar þessar samningaviðræður og þar af leiðandi hef ég ekkert meira um málið að segja.”
María Björk Einarsdóttir, forstjóri Ása eins og félagið heitir núna, segist sömuleiðis vera bundin trúnaði. Orðrétt segir hún: „Við sendum frá okkur fréttatilkynningu sl. mánudag í tilefni slita á viðræðum. Eins og þar kemur fram eru efnisatriði ferlisins háð trúnaði og verða ekki reifuð frekar.”
Eignirnar sem Síminn ætlaði að kaupa voru vefmiðillinn Vísir, upplýsingasíðan já.is, viðskiptafréttamiðillinn Innherji og sölusíðan Bland.is ásamt útvarpsstöðvunum Bylgjunni, Léttbylgjunni, Gullbylgjunni, FM957, X977 og hlaðvarpsveitunni Tal. Fyrir þessar eignir átti Síminn að greiða rúmlega 5,2 milljarða króna.
Vefmiðillinn FF7 sagði frá því á fimmtudaginn í síðustu viku að Síminn hefði gert Sýn gagntilboð í viðskiptin upp á 4,5 milljarða króna eða rúmlega 700 milljónum krónum minna en ráðgert hafði verið þegar skrifað var undir skilmálaskjal um viðskiptin í mars. FF7 sagði því að samkvæmt heimildum miðilsins hefði Sýn ekki svarað þessu gagntilboði.
Líklegt að ákvörðunin hafi átt sér langan aðdraganda
Hefðu sjónvarpsfréttir Sýnar verið lagðar niður ef orðið hefði af þessum viðskiptum við Símann? Það er ómögulegt að segja en ljóst er að þessar ákvarðanir haldast í hendur að einhverju leyti. Ef Síminn, eða Ásar, hefði keypt þessar fjölmiðlaeignir eins og Vísi og Bylgjuna, hefðu forsendur Sýnar til að halda úti fréttastofu og sjónvarpsfréttatíma breyst verulega.
Þegar sagt var frá þessum fyrirhuguðu viðskiptum Sýnar og Símans í mars kom fram að ekki væri búið að taka ákvörðun um það hvað yrði um sjónvarpsfréttir Sýnar eftir viðskiptin við Símann.
Stjórnendur Sýnar hafa væntanlega beðið með þessa ákvörðun um að leggja sjónvarpsfréttirnar niður þar til niðurstaða lá fyrir um viðskiptin fyrirhuguðu við Símann. Nú eru sjónvarpsfréttirnar lagðar niður þrátt fyrir að viðskiptin við Símann hafi ekki gengið í gegn og þrátt fyrir að Sýn muni halda áfram að reka fréttastofu og segja fréttir í tveimur vinsælustu fjölmiðlum landsins, Vísi.is og útvarpsstöðinni Bylgjunni.
Í tilkynningu Sýnar í morgun segir að að stjórnendur Sýnar hafi tekið þá ákvörðun að hætta með sjónvarpsfréttirnar vegna breyttra neysluvenja almennings. Þar segir líka að fyrirtækið ætli sér að styrkja fréttaflutning á Vísi og Bylgjunni, miðlum sem fyrirtækið ætlaði sér að selja þar til í síðustu viku.
Þar segir orðrétt: „Ákvörðunin er tekin í ljósi breyttra neysluvenja almennings þar sem sífellt fleiri sækja sér fréttir og fréttatengt efni á stafrænum miðlum. Sýn mun því beina auknum krafti að fréttaþjónustu á Vísi og Bylgjunni og leggja áherslu á að miðla fréttum þar sem eftirspurn eftir fréttaefni er mikil. Fréttastofa Sýnar mun áfram sinna fréttaþjónustu af fagmennsku og þróa miðlun frétta í takt við breyttar neysluvenjur landsmanna. Markmiðið er að styrkja fréttaþjónustu Sýnar á Vísi og Bylgjunni og tryggja um leið grundvöll fyrir sjálfbærum rekstri.”
Miðað við þetta er afar líklegt að stjórnendur Sýnar hafi verið búnir að ákveða að hætta með kvöldfréttirnar óháð viðskiptunum við Símann. Ef Vísir og Bylgjan hefðu verið seld til Símans, líkt og til stóð, hefði ákvörðunin að leggja niður sjónvarpsfréttir á Sýn hins vegar kannski ekki vakið eins hörð viðbrögð og nú.
