„Ég vil leggja áherslu á að orðið „flóð“ nær varla að lýsa ástandinu á þessum erfiðu tímum,“ sagði Lok Bahadur Poudel, talsmaður utanríkismála í Nepal, þegar hann veitti fjölmiðlum upplýsingar um stöðu mála eftir hamfarirnar sem dundu yfir landið á miðvikudag. Það þarf ekki annað en að skoða myndskeið og myndir til að sjá að það eru orð að sönnu.
Staðan núna er að 3.925 manns er saknað, en þeim fækkaði nokkuð í nýrri tilkynningu sem kom eftir hádegið. 939 hafa fundist látnir og ekki hefur tekist að bera kennsl á þá alla. Yfir 2.500 byggingar eyðilögðust sem eru tvær af hverjum þremur byggingum á þeim þremur landssvæðum sem Copernicus, veðurfræðistofnun Evrópu, hefur skoðað. Kraftur flaumsins var slíkur að minnst 17 lík bárust alla leið til Indlands áður en þau fundust.
Stærsta einstaka björgunaraðgerðin á sér líklega stað á svæði sem kallast efra Trishuli 3A. Þar eru 639 starfsmenn vatnsaflsvirkjunar fastir í göngum og er búið að draga upp þrjú lík þaðan. Um 250 hefur verið bjargað. Eins og myndskeiðið hér að ofan sýnir eru aðstæður afar erfiðar. Stjórnvöld telja að 100 af þessum starfsmönnum séu enn á lífi og því er mikið kapp lagt á að komast að þeim. Björgunarmenn, sem eru að hluta til erlendis frá, hafa reynt að grafa sig í gegnum leðjuna og dæla inn lofti til að tryggja súrefni í göngunum. Þá hefur verið notast við bora og jafnvel sprengjur til að komast í gegn.
Alls skemmdust 12 vatnsaflsvirkjanir í hamförunum. Arnold Dix, verkfræðiprófessor í Ástralíu sem veitir ráðgjöf í björgunaraðgerðunum, segir að sums staðar þar sem virkjanirnar stóðu sé ekki að sjá nein ummerki um þær. Nú sé landslagið næstum því eins og á tunglinu.
546 saknað í Kína
Umfangsmiklar björgunaraðgerðir standa líka yfir í Gyirong í Kína skammt frá landamærunum að Nepal, þar sem flóðið skall af krafti á landamærastöð. Þar segja kínverskir fjölmiðlar, sem eru eina upplýsingaveitan um hamfarirnar, að 16 séu látnir og 546 sé saknað. Myndirnar af björgunaraðgerðunum hér að ofan eru frá kínverska sjónvarpinu. Aðgengi annarra fjölmiðla en kínverskra er takmarkað og því erfitt að fá upplýsingar um gang aðgerða.
Það er víða sem nöturlegar afleiðingar hamfaranna sjást. Líkhús hafa ekki undan að taka á móti jarðneskum leifum fólks. Því hafa yfirvöld neyðst til að grafa lík í fjöldagröf jafnvel þó að ekki sé búið að bera kennsl á þau. DNA-sýni eru þó tekin af þeim. Yfirvöld hafa beðið önnur lönd um aðstoð og segjast þurfa 1000 frystiskápa til að geyma lík.
Þeir sem bíða fregna af ástvinum sínum hafa þurft að skoða myndir af jarðneskum leifum á tölvuskjá til að reyna að bera kennsl á látið fólk.
Heilu þorpin eyðilögðust í þessum hamförum. Hús hrundu eða fylltust af vatni. Margar fjölskyldur eru heimilislausar eða dvelja í neyðarskýlum. Sameinuðu þjóðirnar segja að tugir þúsunda þurfi á neyðaraðstoð að halda. Þá eru ótaldir innviðir sem hafa eyðilagst, eins og vegir, brýr og virkjanir. Þá eru mörg þorp einangruð þar sem ekki er hægt að komast þangað og greip lögreglan til þess ráðs að nota dróna til að koma skilaboðum áleiðis til þeirra þorpa sem ekki var hægt að komast til.
Það er þó að finna góðar fréttir. Áðurnefndur Lok Bahadur Poudel sagði að yfir 10 þúsund manns hefði verið bjargað af þeim svæðum sem hörmungarnar dundu yfir, þar af yfir 300 útlendingum. En eftir því sem frá líður dvína vonir um að margir eigi eftir að finnast á lífi.
Orsök hörmunganna er jökulhlaup sem varð þegar stórir klumpar hrundu úr jökli og í á. Hún stíflaðist og þegar stíflan brast leiddi það af sér þetta stóra flóð eins og sést hér að ofan. Ekki er búið að staðfesta með fullri vissu hvað olli hlaupinu en vitað er að loftslagsbreytingar hafa leitt til þess að jöklar eru að bráðna víða um heim, sem eykur hættuna á svona hamförum.
