Rússnesk stjórnvöld segjast ekki hafa nokkurn áhuga á afskiptum af þjóðaratkvæðagreiðslunni um framhald aðildarviðræðna Íslands við Evrópusambandið. Vísir greindi frá þessu í nótt og vísar til yfirlýsingar sem rússneska sendiráðið í Noregi birti opinberlega vegna fyrirspurnar dagblaðsins Aftenposten.
Þar segir að Rússar leitist ekki við að hafa áhrif á innanríkismál annarra landa og ætli sér ekki að hafa áhrif á niðurstöðu þjóðaratkvæðagreiðslunnar 29. ágúst. Sendiráðið sakar hins vegar Evrópusambandið sjálft um að reyna að hafa áhrif á hana.
„Viðreisnarbottarnir“ vekja ugg
Vísir segir Aftenposten hafa fjallað um atkvæðagreiðsluna og svokallaða „Viðreisnarbotta“, gervigreindarþjarka sem höfðu uppi gagnrýni á forstjóra Vélfags undir Facebook-færslu hans og færslum Viðreisnar ásamt því að hlaða Þorgerði Katrínu Gunnarsdóttur utanríkisráðherra lofi, oft á bjagaðri íslensku.
Svanborg Sigmarsdóttir framkvæmdastjóri flokksins hafi tilkynnt áreiti bottanna til lögreglu í maí og Þorgerður sagt þá skýrt dæmi um tilraunir erlendis frá til þess að hafa áhrif umfjöllun hérlendis. Svanborg kvað ósennilegt að raunverulegir reikningar væru að baki athæfinu.
Rússar iðulega sakaðir um íhlutun og bein afskipti
Rússar hafa verið sakaðir um afskipti af lýðræðislegum kosningum eða tilraunir til þess víða um heim. Meðal annars má nefna kosningar í Moldóvu, forsetakosningar í Bandaríkjunum og í Frakklandi að ógleymdum hernaðarlegum og pólitískum afskiptum af Úkraínu og nágrannalöndum.
Einnig hafi Rússar beitt harðri orðræðu gegn Norðurlöndum, til að mynda Finnlandi, sem öryggissérfræðingar telja tilraun til að ala á ótta og grafa undan samstarfinu við Atlantshafsbandalagið.
Sömuleiðis hafa rússnesk stjórnvöld verið sökuð um hernaðarstuðning við einræðisstjórnir í ríkjum Afríku, meðal annars gegnum málaliðahópa og einnig skipulögðum áróðursherferðum til að draga úr stuðningi við lýðræðisumbætur.
