Sá er munurinn á uppbyggingaráformum núverandi ríkisstjórnar í húsnæðismálum og húsnæðispökkum síðustu ríkisstjórnar að nú er um raunveruleg verkefni að ræða en ekki loftkenndar almennt orðaðar áætlanir sem veltu ábyrgðinni einatt yfir á sveitarfélögin. Nú er ríkið raunverulegur þátttakandi og áformin áþreifanleg. farið er í uppbyggingu á tilteknum lóðum og eignum en ekki gert bara eitthvað. Ragnar Þór Ingólfsson, félags- og húsnæðismálaráðherra, er gestur Ólafs Arnarsonar í hlaðvarpi Eyjunnar.
Hér er hægt að hlusta á brot úr þættinum:
Ragnar Þór Ingólfsson - 3
„Skipulagslögin verða endurskoðuð og sú vinna er að fara af stað. Og það er kannski ekki endilega alltaf bara lagabókstafurinn sem að er að þvælast fyrir heldur líka skilvirknin inni í kerfunum. Það er auðvitað ekki boðlegt eins og til dæmis formaður Samtaka iðnaðarins, Þorsteinn Víglundsson, hefur bent á og fleiri að við séum hér með ný hverfi sem getur tekið hátt í 10 ár að koma af stað. Þetta er einfaldlega eitthvað sem gengur ekki upp til lengdar og sérstaklega ekki ef við ætlum að ná jafnvægi á húsnæðismarkaði til lengri tíma. Þannig að ég bind mjög miklar vonir við að sú vinna, ekki endilega bara einhverjar lagabreytingar heldur líka að við náum að einfalda alla ferla. Við tókum til dæmis núna í desember síðastliðnum upp rafræna ferla sem hafa verið í vinnslu í þó nokkurn tíma varðandi rafræn skil á gögnum og teikningum og fleira sem við erum að fylgja eftir. Þannig að þetta er ekki vinna sem er að fara af stað, þetta er svona meira vinna sem er á lokametrunum og síðan auðvitað líka skipulagslögin. Þar þurfum við líka að skoða vaxtamörkin, hvernig þetta fyrirkomulag er. Getur eitt sveitarfélag haft algjört neitunarvald varðandi uppbyggingu utan svæðisskipulags?
Eða þurfum við að gera breytingar á þessu sem að ég reikna með að við þurfum að gera. Því að svæðisskipulagið sem slíkt er, þær forsendur sem voru gerðar 2015 varðandi íbúafjölgun til 2040 eru auðvitað löngu brostnar og það þarf að endurskoða það samkomulag. Hvort það verði gert með lagabreytingu eða samtali verður að koma í ljós. En þetta helst allt í hendur og ég hef fulla trú á því að með samstilltu átaki sveitarfélaga og ríkisins, vegna þess að við erum að fara í aðra uppbyggingarsamninga, erum að fara í viðræður við Hafnarfjörð og Reykjanesbæ sem dæmi, að við náum að flýta þessum ferlum og þessari vinnu eins og kostur er.“
Ég heyrði að Sigmundur Davíð Gunnlaugsson segir að þetta sé nú bara svona eins og vorboðinn, alltaf fyrir kosningar, þá sé komið og kynntur einhver pakki. Er þetta svo eða hver er munurinn á þessu? Nú man ég að í tíð síðustu ríkisstjórnar voru kynntir ýmsir pakkar og ekki varð neitt úr neinu í raun og veru.
„Kannski munurinn á þessu og til dæmis í tíð síðustu ríkisstjórnar, það voru kynntir húsnæðispakkar sem námu tugum þúsunda íbúða í uppbyggingu. Það var gert í gegnum svona húsnæðisáætlanir sveitarfélaga. Þær áætlanir stóðust auðvitað ekki nema kannski að hluta til. Ég hef nú samt trú á því að sú vinna hafi samt gagnast vegna þess að við erum að byggja auðvitað okkar vinnu að hluta til á þeirri vinnu sem hefur verið unnin áður, þannig að ég ætla nú ekki alveg að skjóta á þau í kaf. En munurinn til dæmis á þessu tiltekna verkefni sem við vorum að kynna í vikunni er að þetta eru fýsísk verkefni. Þetta er ekki einhver áætlun um …“
Þetta eru ekki skýjaborgir?
„Nei, og þetta er heldur ekki áætlun um eitthvað. Við ætlum að byggja bara einhvers staðar eða á höfuðborgarsvæðinu og sveitarfélögin bara finna út úr því. Við erum að fara í raunveruleg fýsísk verkefni.“
Þetta eru tiltekin svæði sem eru þarna til og tilteknar eignir.
„Já, meðal annars stendur til að breyta húsnæði Skattsins á Laugavegi í íbúðir. Við erum að fara í uppbyggingu á Laugarnesvegi. Ágóðinn af þeirri uppbyggingu á síðan að skila sér í uppbyggingu á nýjum Listaháskóla. Við erum að fara í uppbyggingu á Seljavegi sem að hefur auðvitað lengi staðið til en aldrei einhvern veginn tekist að klára það sem gamli landhelgisgæslureiturinn , eða kenndur við Landhelgisgæsluna. Og það er til dæmis bara flókið ferli vegna þess að sú ríkiseign er inni í skúffufélagi í fjármálaráðuneytinu sem átti að standa undir kostnaði við uppgerð á gamla hegningarhúsinu við Skólavörðustíg. Ralaland sem er 20 hektara land austan við Korpúlfsstaði og tengist svona inn í Blikastaðalandið. Þetta er auðvitað bara landsvæði sem að hefur staðið tómt og við erum að fara í uppbyggingu þar. Það er kannski svona sú framkvæmd eða sú uppbygging sem er svona fjærst okkur í tíma. Annað er nær okkur og það er bara í eðli svona uppbyggingar að sumt tekur skemmri tíma, annað lengri. Það er auðvitað vinna í gangi með svæði uppi í Úlfarsárdal. Og síðan auðvitað erum við að horfa á til framtíðar svæði sem mögulega geta tengst þá Sundabraut sem snúa þá að Álfsnesi, Kjalarnesi og þeim svæðum sem við getum horft til framtíðar.
Það er svolítið merkilegt þegar maður heimsækir mikið af þessum uppbyggingarfélögum á Norðurlöndunum, eins og í Noregi, Obos, og AB í Danmörku og fleiri félög sem ég hef heimsótt, að þar er einmitt mesta áherslan lögð, ekki á það sem menn eru að gera í dag heldur það sem þeir ætla að gera eftir 10 ár og eftir 20 ár. Sú vinna er í fullum gangi hjá þessum rótgrónu risastóru félögum. Það er þessi þróunarvinna til lengri tíma. Og það er það sem er auðvitað mjög snúið við þetta, við erum að reyna að takast á við vanda bæði til skemmri og til lengri tíma. Og hvoru tveggja mjög mikilvægt. Það er auðvitað áskorun að gera það til lengri tíma þar sem við höfum einungis hvað, fjögur ár. En vonandi getur sú vinna, í það minnsta, komist síðan áfram í aðrar góðar hendur ef það verða breytingar eftir næstu kosningar og það sé þá hægt að vinna áfram til lengri tíma.
En varðandi orð Sigmundar Davíðs um einhverjar glærukynningar og glærupakka, þá eru þetta raunverulegir samningar. Þetta eru raunverulegir uppbyggingarsamningar. Þetta er afrakstur vinnu sem hefur tekið mjög langan tíma og margir komið að, bæði auðvitað meirihlutinn í Reykjavíkurborg. Við erum síðan auðvitað í samtali við önnur sveitarfélög þar sem flokkar sem eru í stjórnarandstöðu á þingi eru í meirihluta og eru að stýra. Verkefnið í heild sinni er myndi ég segja þvert á pólitík vegna þess að þetta snýst um uppbyggingarsamninga og auðvitað átti maður alveg von á því að þar sem þetta er komið mjög nálægt sveitarstjórnarkosningum að einhverjir myndu stíga fram og gefa þessu falleinkunn. Það var auðvitað bara eðlilegt og viðbúið. En ég tel mig vita að þeir sem hafa einhverja hugmynd um hvað málið snýst og út á hvað uppbyggingarsamningar ganga, að þá tali þeir gegn betri vitund um að þetta sé eitthvað sjó í gangi. Ef þú hefur einhverja hugmynd um húsnæðisuppbyggingu, þá ættirðu að vita betur.“
Hægt er að hlusta á hlaðvarpið í heild sinni hér:
Einnig er hægt að hlusta á Spotify.
