Í vikunni var kynntur húsnæðispakki sem Reykjavíkurborg og ríkið standa saman að um uppbyggingu 1400 íbúða á ríkislóðum og í ríkiseignum. Þetta er bara fyrsta skrefið. Ríkið er í viðræðum við fleiri sveitarfélög um samstarf af sama toga. Á sama tíma er verið að stórbæta þjónustu við leigjendur í samstarfi við Neytendasamtökin. Ragnar Þór Ingólfsson, félag- og húsnæðismálaráðherra, er gestur Ólafs Arnarsonar í hlaðvarpi Eyjunnar.
Hér er hægt að hlusta á brot úr þættinum:
Ragnar Þór Ingólfsson - 1
„Við vorum að kynna hluta af húsnæðispakka tvö, sem er uppbygging á ríkislóðum og síðan líka ríkiseignir sem verður breytt í íbúðir. Við vorum að klára mjög umfangsmikla samninga við Reykjavíkurborg, uppbyggingarsamninga. Inni í þeim pakka voru líka svokallaðir makaskiptasamningar, meðal annars verið að ganga frá eignaskiptum á lóð uppi á Hólmsheiði sem á að vera undir öryggisvistunarúrræði sem við erum að fara að byggja upp. Þannig að það var mikið gleðiefni að ná að klára þetta. Þetta hefur verið langur aðdragandi. Það hefur auðvitað verið reynt áður að koma þessum, hvað á ég að segja, ríkislóðum í vinnu sem hafa staðið auðar og ekki skilað ríkinu neinum tekjum og svo sem ekki samfélaginu nokkurt gagn heldur. Þetta er ferli sem hófst fyrir rúmlega ári síðan þegar við sem vorum kjörnir í sérstakan aðgerðahóp í húsnæðisuppbyggingu fórum að kortleggja þær ríkiseignir og ríkislóðir sem við töldum fýsilegan kost til þess að byggja upp á með þá áherslu á hagkvæmt húsnæði á viðráðanlegu verði, hvort sem það er til kaups eða leigu.
Þetta er fyrsti samningurinn sem við gerum eftir þá vinnu og ég bara ítreka það að það er virkilega ánægjulegt að hafa náð þeim áfanga að klára þetta og eitthvað sem hefur ekki tekist að gera í, ja, alla vega yfir 10 ár. Það sem að hefur verið reynt og þegar ég var til dæmis í forsvari fyrir Bjarg íbúðafélag, sem að er í eigu Alþýðusambands Íslands og BSRB, þá höfðum við meðal annars augastað á nokkrum ríkislóðum sem við höfðum áhuga á að byggja upp, en það hefur ekkert gengið eða rekið í þeim efnum.
Síðan erum við auðvitað að fara af stað með uppbyggingarsamninga við fleiri sveitarfélög, þetta er ekki bara Reykjavíkurborg. Og inni í þessum húsnæðispakka er líka svona ákveðið átak sem við erum að fara að ráðast í varðandi uppbyggingu á landsbyggðinni og við erum þá að horfa á, eins og þetta er kallað, svokölluð kaldari svæði og það erum við að gera með því að efla leigufélögin Bríet og Brák sem eru rekin undir Húsnæðis- og mannvirkjastofnun. Munum efla þau og það er svona hluti af þeirri vegferð og síðan í þessu líka er landsáætlunin gegn heimilisleysi og sömuleiðis líka erum við í mjög góðu samtali við Samtök sveitarfélaga um sameiginlegt markmið okkar að eyða biðlistum fyrir húsnæði fyrir fatlað fólk.
Það er líka stór aðgerðapakki sem að við erum að byrja á núna fyrir leigjendur. Við erum nú þegar búin að gera samning við Neytendasamtökin varðandi leigjendaaðstoðina, stórefla hana, kynningu og fræðslu fyrir leigjendur, þannig að þeir þekki rétt sinn. Það er gríðarlega mikilvægt, og það þekki ég bara úr mínu gamla starfi í stéttarfélagi. Ef stéttarfélagið er öflugt þá er réttindagæslan auðvitað miklu betri og líkurnar á því að brotið sé á vinnandi fólki, eða í þessu tilfelli leigjendum, verður mun ólíklegri ef bæði leigusali og leigjendur þekkja betur sinn rétt og hafa síðan gott bakland til þess að leita til ef um ágreining er að ræða. Samhliða því erum við líka að stórefla kærunefnd húsamála sem er með biðtíma eftir afgreiðslu mála sem er langt umfram það sem að getur talist ásættanlegt og sömuleiðis líka lögbundið.“
