Alvotech hefur efnt til útboðs á hlutabréfum í Bandaríkjunum samhliða lokuðu útboði til fagfjárfesta á Evrópska efnahagssvæðinu. Áætlað er að andvirði bréfa sem fjárfestar kaupa af félaginu verði um 15,6 milljarðar íslenskra króna eða 125 milljónir bandaríkjadala.
Sameiginlegir umsjónaraðilar almenna útboðsins eru fjárfestingabankarnir BofA Securities, Jefferies og Evercore ISI. Greint er frá þessu í tilkynningu frá Alvotech.
Þar segir að félagið hafi veitt umsjónaraðilum útboðsins heimild til þess að kaupa til viðbótar allt að 15% bréfanna sem eru í boði á útboðsgenginu að frádregnum afslætti og þóknun, innan 30 daga. Öll bréfin sem eru til sölu verða gefin út og seld af Alvotech.
„Samhliða opna útboðinu gerir Alvotech ráð fyrir að gera áskriftarsamninga við tiltekna fjárfesta sem eru fagfjárfestar eða viðurkenndir gagnaðilar á Evrópska efnahagssvæðinu (EES) í skilningi greinar 1(4) í reglugerð Evrópuþingsins og ráðsins 2017/1129. Þessum fjárfestum verða boðin bréf á sama gengi og gilda mun í almenna útboðinu. Almenna útboðið er ekki háð niðurstöðu lokaða útboðsins,“ segir í tilkynningunni.
Ekki hefur verið tekin ákvörðun um skiptingu hluta milli þátttakenda í útboðinu í Bandaríkjunum og evrópsku fagfjárfestanna. Hún muni taka mið af tilboðsgenginu.
Í tilkynningunni segir að Alvotech hyggist nýta afrakstur af sölu bréfanna til þess að fjármagna þróun nýrra hliðstæðna líftæknilyfja, í veltufé og til að standa straum af rekstrarkostnaði. Það sé meðal annars til að vernda lyfjahugvit félagsins, almenn rekstrarútgjöld, fjárfestingar í fastafjármunum, kaup á búnaði, í forklínískar og klínískar rannsóknir, við vöruþróun og til endurgreiðslu skulda eða endurfjármögnunar.
„Almenna útboðið í Bandaríkjunum fer fram í samræmi við grunnskráningarlýsingu á eyðublaði F-3 sem upprunalega var lögð inn til Verðbréfaeftirlits Bandaríkjanna (SEC) 20. október 2023 og tók gildi 30. október sama ár. Þá fer sala bréfanna sem í boði eru til bandarískra fjárfesta í þessu útboði fram í samræmi við sérstakan viðauka við grunnskráninguna.“
