Jakob Frímann Magnússon, einn aðalskipuleggjenda tónlistarveislunnar Bergmáls sem fram fer á Þingvöllum á morgun, segir uppsetningu sviðs- og veitingaaðstöðu lokið og annan undirbúning á lokametrunum.
Nú eigi einungis eftir að prófa hljóðgæðin og svo auðvitað að taka á móti þeim tugþúsundum gesta sem streyma munu í þjóðgarðinn á morgun, en að því verkefni munu á annað þúsund manns standa, þar af um 100 lögreglumenn.
Rétt er að fara yfir þau atriði sem tónleikagestir og aðrir sem eiga leið um svæðið verða að hafa í huga. mbl.is ræddi við Jakob Frímann um þær spurningar sem á fólki hvíla fyrir morgundaginn.
Hann segir að þó að leitað verði á fólki að vopnum verði ekki gerð sérstök matvælaleit. Einnig sé það mikill misskilningur að fólk muni ekki komast af tónleikasvæðinu fyrr en á miðnætti.
Fólk hafi með sér útivistarfatnað
Sólin mun leika við suðvesturhornið á morgun ef marka má núverandi veðurspár, en þó er ekki ósniðugt að hafa með sér hlýrri föt til vonar og vara að sögn Jakobs.
„Það er rétt að biðja fólk, þótt það sé góð spá og sól í heiði, að hafa með sér útivistarfatnað og þvíumlíkt til að hafa við hendina þegar það tekur að kólna undir kvöldið,“ segir hann.
Ekki verður hægt að hafa með sér regnhlífar sökum tilmæla lögreglu en veðurspáin er prýðileg sem stendur og því alls kostar ólíklegt að þeirra gerist þörf.
Hvaða reglur gilda um matvæli á svæðinu?
Hvorki er heimilt að koma með áfengi né matvæli inn á svæðið, einhverjum tónleikagestum til ama.
Jakob segir hinar stífu reglur tilkomnar vegna tilmæla umsjónaraðila Þingvallaþjóðgarðs og veitingamanna á svæðinu, en komið hefur verið upp veitingaþorpi til móts við tónleikasvæðið þar sem kaupa má mat og drykk.
„Það er enginn að fara að leita beinlínis að einhverjum matvælum,“ segir hann og tekur það fram að hvorki barnamatur né sérfæði verði tekið af fólki. Ekki sé þó ætlast til þess að fólk komi með matvæli inn á svæðið í stórum stíl.
Hvar er hægt að sitja?
Vopnaleit verður framkvæmd við komu gesta á svæðið og í henni verða tjaldstólar, regnhlífar og garðhúsgögn fjarlægð í samræmi við tilmæli lögreglu að sögn Jakobs Frímanns.
„Stundum hefur slíkt verið notað sem einhvers konar vopn, en við erum ekki að gera ráð fyrir regni og það er nóg af sætum út um víðan völl hér, bæði stólum og borðum og brettum sem menn geta setið á.“
Spurður hvort hann hafi áhyggjur af því að útilegustemningin muni líða fyrir þessi tilmæli, eins og einhverjir tónleikagestir hafa kvartað yfir, segir Jakob það aldrei hafa verið tilætlunina að skapa slíka stemningu.
„Þetta er náttúrulega ekki útilega eða útihátíð, það stóð aldrei til að hér yrði tjaldað eða sofið yfir nótt,“ segir hann. „Það er ekki hluti af áætluninni – þetta byrjar klukkan ellefu í fyrramálið og lýkur á miðnætti annað kvöld.“
Eftir að dagskrá lýkur verður fólk ferjað út af hátíðarsvæðinu í átt að bílastæðum. Vonast tónleikahaldarar eftir því að síðustu gestir verði farnir fyrir klukkan 03:00.
Hvernig verður rútuferðunum háttað?
Hægt verður að ferðast með rútu frá Klettagörðum 27 í Reykjavík að aðalinngangi tónleikasvæðisins við gestastofuna Hakið og aftur í borgina á tónleikadag.
Fyrsta rútuferð að Þingvöllum fer klukkan 10:00 á morgun og fara þær svo á hálftíma fresti þangað til klukkan 19:00 um kvöldið.
Klukkan 20:00 hefjast svo sætaferðir aftur til Reykjavíkur sem farnar verða þegar rúturnar fyllast.
Rútuferðir verða einnig farnar að tónleikasvæðinu frá Selfossi klukkan 12:30 og 14:00 á morgun og gildir hið sama um ferðir aftur til Selfoss og til Reykjavíkur.
Rútumiði kostar 8.900 krónur fyrir báðar leiðir og leggst verð hans ofan á miðaverðið.
Miðaverð er 23.900 krónur á sölusíðu tónleikanna en þeir hafa verið auglýstir til sölu á Facebook fyrir öllu lægra verð.
Má fara hvenær sem er?
Einhverjir hafa látið uppi áhyggjur af því að ekki verði hægt að keyra burt af svæðinu meðan á veglokunum stendur, svo er ekki að sögn Jakobs.
„Það virðist vera einhver misskilningur uppi um að það verði hömlur á umferðinni út, en menn munu geta keyrt út hvenær sem þeim sýnist,“ segir hann.
Aðgangsmiðar að niðurgreiddum bílastæðum fyrir fólksbíla að Leirum og Tæpastíg eru uppseldir, en þeir ganga nú kaupum og sölum á þar til gerðum Facebook-síðum.
Gestir sem hyggjast nýta sér þau stæði verða að mæta þangað fyrir klukkan 16:00 og rýma þarf stæðin eigi síðar en klukkan 03:00 aðfaranótt sunnudags. Kostuðu þeir miðar 1.490 krónur, en miðar að bílastæði við Brúsastaði eru enn falir fyrir 4.990 krónur.
Veglokanir munu einungis gilda um umferð í átt að hátíðarsvæðinu en ekki frá því, en slíkar lokanir verða í gildi að vestan við Grafningsafleggjara, við Miðfell að austanverðu og norðan við Þingvelli á Uxahryggjarvegi frá 15:00 til miðnættis.
Mega aðrir en miðahafar heimsækja Þingvelli?
Aðgengi að Þingvöllum verður takmarkað yfir daginn og frá klukkan 15 verður aðgangsstýring inn á svæðið þar sem gestir þurfa að framvísa bílastæðapassa og miða á tónleikana til þess að komast fram hjá veglokunum.
Þá er öll umferð báta og annarra farartækja bönnuð á Þingvallavatni innan þjóðgarðsins frá klukkan 08:00 til miðnættis.
Nánari upplýsingar um reglur og fyrirkomulag tónleikanna má nálgast hér.
