Sextán ára strákur í Kópavogi fékk óvenjulegan arf þegar faðir hans lést árið 2018. Strákurinn erfði hina flennistóru Vatnsendajörð við Elliðavatn í Kópavogi og varð um leið miðdepill í einum flóknustu erfðadeilum okkar tíma.
Deilurnar eiga rætur sínar að rekja til umdeildrar erfðaskrár sem eigandi jarðarinnar gerði fyrir 90 árum. Erfðaskráin hefur fært útvöldum karlmönnum í Hjaltested-ættinni jörðina og ómæld auðæfi en líka hneppt þá í fjötra.
Jörðin er framtíðarbyggingarland höfuðborgarsvæðisins og Kópavogsbær hefur áform um að reisa á henni rúmlega þúsund manna byggð. Á undanförnum áratugum hefur verið tekist hart á um hver eigi og megi búa á Vatnsendajörðinni og á annan tug dóma hafa verið kveðnir upp. Ótti við frekari málaferli hefur fælt Kópavogsbæ frá því að hefja uppbyggingu á landinu.
Dómsmálin enn í gangi
Enginn endir virðist vera á málaferlum um Vatnsenda. Sá sem nú ræður ríkjum á jörðinni heitir Magnús Pétur Hjaltested og er 23 ára. Hann erfði jörðina og ættaróðalið við Elliðavatn þegar faðir hans, Þorsteinn Hjaltested, lést árið 2018. Þá var Magnús Pétur aðeins 16 ára. Hann fékk fjárhaldsmann til að sjá um fjármál sín og lögmanninn Sigurbjörn Ársæl Þorbergsson til að gæta réttinda sinna. Sigurbjörn var áður lögmaður föður og afa Magnúsar Péturs.
Nú hefur Sigurbjörn stefnt Magnúsi Pétri fyrir vanefndir og krefur hann um um það bil milljarð króna. Málið verður tekið fyrir Héraðsdóm Reykjavíkur þriðjudaginn 22.júní.
Í þáttunum Álögin á Vatnsenda er farið yfir lygilega sögu nokkurra kynslóða erfingja á Vatnsenda.
