Sextíu daga frestur sem Donald Trump Bandaríkjaforseti hefur til að fá samþykki þingsins fyrir stríðinu í Íran rennur út í dag. Þingmenn eru hins vegar ekki á einu máli um túlkun þessa ákvæðis. Sumir stjórnarþingmenn líta svo á að stríðinu hafi lokið þegar yfirstandandi vopnahlé tók gildi.
Í lögum sem sett voru 1973 eftir Víetnamsstríðið ber Bandaríkjaforseta að fá samþykki þingsins fyrir áframhaldandi stríðsrekstri sextíu dögum frá því tilkynning um hann barst og slíkur stríðsrekstur sé aðeins heimill ef ógn steðjar að landinu. Ef samþykki fæst ekki fyrir þann tíma ber forsetanum að hætta öllum hernaði þegar í stað. Tilkynningin um stríðið í Íran kom annan mars og því ætti þessi frestur að renna út í dag.
Stjórnvöld í Bandaríkjunum túlka þetta þó á annan veg. Hátt settur embættismaður sagði við AFP-fréttastofuna að í skilningi framangreindra laga hafi átökunum lokið með vopnahléinu sem tók gildi sjöunda apríl. Þar með hafi þessi sextíu daga niðurtalning stöðvast.
Demókratar segja að það sé einfaldlega lögbrot að stöðva ekki stríðið. Þeir reyndu að koma í gegn þingfrumvarpi sem takmarkaði vald forsetans til stríðsreksturs en höfðu ekki erindi sem erfiði. Sumir halda því jafnvel fram að engin yfirstandandi ógn hafi verið fyrir hendi þegar stríðið hófst og því hafi sú aðgerði sem slík verið lögbrot.
Atburðarrásin vekur enn meiri spurningar um getu þingsins til að kanna raunverulegt vald forsetans til stríðsreksturs erlendis. Umræða um það hefur verið nokkuð hörð meðal þingmanna frá því stríðið í Íran hófst. Og órói er farinn að aukast meðal þingmanna Repúblíkana sem eiga erfitt með að sjá hverju stríðið eigi að skila. Nokkrir þeirra hafa lýst því yfir opinberlega að þingið eigi að grípa til aðgerða núna. Demókratar vonast til að þetta verði til þess að einhverjir þingmenn Repúblíkana gangi til liðs við þá í tilraunum þeirra til að ljúka stríðinu.
Enn eru engar friðarviðræður farnar af stað. Lokun Hormússunds heldur áfram að hafa slæm áhrif á efnahag heimsins og olíuverð á heimsmarkaði er nú það hæsta í fjögur ár.
