Bernie Moreno, öldungadeildarþingmaður Repúblikanaflokksins frá Ohio, lét Anthony Fauci heyra það við yfirheyrslur í öldungadeild Bandaríkjaþings í dag og sakaði hann um að bera ábyrgð á aðgerðum stjórnvalda í kórónuveirufaraldrinum sem hefðu haft alvarleg áhrif á milljónir Bandaríkjamanna.
Moreno rifjaði meðal annars upp lokanir skóla, grímuskyldu, reglur um tveggja metra fjarlægð og kröfur um bólusetningar og spurði Fauci að lokum:
„Hver í fokkanum hélstu að þú værir að gera þetta?“
Fauci, sem stýrði bandarísku smitsjúkdómastofnuninni NIAID í 38 ár og varð eitt helsta andlit sóttvarnaaðgerða Bandaríkjanna í faraldrinum, neitaði hins vegar að svara spurningum þingmanna og vísaði í fimmta viðauka stjórnarskrár Bandaríkjanna, sem verndar fólk gegn því að vera neytt til að bera vitni gegn sjálfu sér. Hann neitaði að svara meira en hundrað spurningum á fundinum.
Fólk stóð upp fyrir aftan Fauci
Moreno hóf mál sitt á því að gagnrýna framgöngu Fauci í faraldrinum og bað síðan þá áhorfendur í salnum sem hefðu verið fordæmdir fyrir afstöðu sína til sóttvarnaaðgerða að standa upp.
Hann nefndi þar fólk sem hefði efast um tveggja metra regluna, verið á móti bólusetningu, gagnrýnt grímureglur, misst vinnuna vegna þess að það vildi ekki þiggja bóluefni eða talið lokanir skóla stórfelld mistök.
Nokkrir stóðu upp í salnum og Moreno krafðist þess að Fauci sneri sér við og horfði á þá.
„Horfðu á fólkið sem var niðurlægt fyrir að segja það sem við vitum núna að var satt,“ sagði Moreno og sakaði Fauci um að geta ekki einu sinni horft í augu þeirra.
Reuters greinir frá því að Moreno hafi ítrekað spurt Fauci hvort hann væri tilbúinn að biðja hópa sem þingmaðurinn sagði hafa orðið fyrir skaða vegna sóttvarnaaðgerða afsökunar. Fauci svaraði ekki heldur þeim spurningum.
Segir atvik í faraldrinum hafa ýtt sér út í stjórnmál
Moreno sagðist hafa ákveðið að fara út í stjórnmál eftir að hafa lesið frétt í faraldrinum um móður og börn hennar sem lentu í afskiptum lögreglu vegna þess að þau voru ekki með grímur utandyra á íþróttaviðburði.
„Ég get ekki setið aðgerðalaus hjá og horft á þetta gerast,“ sagðist hann hafa hugsað á sínum tíma.
Hann sagði sex ár hafa liðið frá því að hann ákvað að selja fyrirtæki sín og sækjast eftir sæti í öldungadeildinni.
„Og hér sit ég núna fyrir framan þig sex árum síðar og segi: Hver í fokkanum hélstu að þú værir að gera þetta?“
Fauci vísaði í fimmta viðaukann aftur og aftur
Fauci hafði þegar í upphafi yfirheyrslunnar tilkynnt að hann hygðist, að ráði lögmanna sinna, nýta rétt sinn samkvæmt fimmta stjórnarskrárviðaukanum og neita að svara spurningum.
Hann sakaði Rand Paul, formann nefndarinnar, um að reka persónulega herferð gegn sér og sagði markmið yfirheyrslunnar vera að fá hann til að segja eitthvað sem hægt væri að nota til að réttlæta ítrekuð ummæli Paul um að Fauci ætti að vera ákærður og sæta fangelsisvist.
Fauci hefur áður verið náðaður af Joe Biden, fyrrverandi Bandaríkjaforseta, vegna mögulegra brota tengdum störfum hans fyrir bandarísk stjórnvöld og viðbrögðum við heimsfaraldrinum. Náðunin nær hins vegar ekki til háttsemi sem átti sér stað eftir að hún var gefin út í janúar 2025.
Rand Paul sagði eftir yfirheyrsluna að nefndin myndi í næstu viku greiða atkvæði um hvort Fauci yrði talinn hafa sýnt Bandaríkjaþingi vanvirðingu vegna neitunar hans um að svara spurningum.
Yfirheyrslan fór fram fyrir heimavarnaráði og stjórnsýslunefnd öldungadeildarinnar í Washington í morgun.
