Einar Þorsteinsson, borgarfulltrúi Framsóknarflokksins, segir að samningur Reykjavíkurborgar um hjólhýsabyggð í Gufunesi hafi verið „fullkomlega óboðlegur“ og ein af mörgum ákvörðunum sem síðasti meirihluti í borgarstjórn tók án skoðunar.
Þetta segir Einar í viðtali við Vísi.
Eitt fyrsta verk nýs meirihluta í borgarstjórn var að segja upp nýundirrituðum samningi Reykjavíkurborgar við Samtök hjólabúa, þar sem hópnum var veittur aðgangur að landsvæði í Gufunesi fyrir hjólhýsabyggð. Þangað átti að flytja hjólhýsabyggð sem hefur verið á Sævarhöfða.
Í viðtali við Vísi segir Einar að hann telji hjólhýsagarða ekki gott búsetuúrræði. Þá liggi fyrir að stór hluti þeirra sem setjast þar að geri það ekki vegna fátæktar, heldur velji sér þetta búsetuform og þurfi þá ekki að borga sömu skatta og skyldur og aðrir.
Einar gagnrýnir sömuleiðis að Geirdís Hanna Kristjánsdóttir, íbúi í hjólhýsabyggðinni, hafi beitt sér fyrir samkomulaginu en hún hefur verið varaborgarfulltrúi Sósíalistaflokksins. Segir hann borgarfulltrúa eiga að gæta almannahagsmuna en ekki hagsmuna eigin flokksmanna.
Þá segir hann að borgarlögmaður og umhverfis- og skipulagsráð borgarinnar hafi veitt neikvæða afstöðu til samningsins, án þess að meirihlutinn hafi tekið tillit til þess. Borgin hafi enn fremur metið að það kostaði 50 til 100 milljónir króna að uppfylla ákvæði samningsins.
