Lögregluskýrsla sem Nútíminn hefur undir höndum sýnir að eftir umfangsmikla yfirferð á skotvopnaeign Guðjóns Valdimarssonar, föður þáverandi ríkislögreglustjóra, stóðu níu atriði enn eftir sem lögregla hafði annaðhvort ekki getað staðfest eða taldi ekki stemma við gefnar skýringar. Rannsókn á hendur Guðjóni var síðar felld niður. Ekki liggur fyrir í þeim gögnum sem Nútíminn hefur undir höndum hvort öll þessi atriði voru leyst áður en sú ákvörðun var tekin.
Ný gögn úr rannsókn lögreglu á svokölluðu hryðjuverkamáli varpa frekara ljósi á umfangsmikla rannsókn sem fór fram á skotvopnaeign Guðjóns Valdimarssonar, þekkts vopnasala og skotvopnasafnara og föður Sigríðar Bjarkar Guðjónsdóttur, þáverandi ríkislögreglustjóra.
Húsleit var gerð á heimili Guðjóns í Hafnarfirði 28. september 2022 eftir að nafn hans kom upp við rannsókn málsins. Vegna fjölskyldutengslanna sagði Sigríður Björk sig frá rannsókninni og rannsóknarforræðið var flutt til héraðssaksóknara.
Í nýlegri samantekt Vísis um hryðjuverkamálið kemur fram að 173 skotvopn hafi verið skráð á Guðjón. Sum hafi verið skráð týnd, önnur óskráð og önnur skráð á hann án þess að þau fyndust við húsleit. Þar kemur jafnframt fram að rannsókn á hendur Guðjóni hafi síðar verið felld niður.
Hér er brot úr nýlegu viðtali við Svein Andra Sveinsson á Brotkast, þar sem hann fjallaði um föður fyrrum ríkislögreglustjóra.
Sveinn Andri Sveinsson um hryðjuverkamálið. Allt viðtalið á https://t.co/fFjzIETkYR pic.twitter.com/HbZ1G0AVBm
— Brotkast (@brotkasttv) August 14, 2026
44 vopn eða íhlutir fundust ekki við húsleitina
Sérstök skýrsla lögreglufulltrúans Þórarins Þórarinssonar, dagsett 21. nóvember 2022, sýnir hvað gerðist þegar lögregla fór síðar kerfisbundið yfir skotvopnaskrá Guðjóns.
Þórarinn starfaði samkvæmt skýrslunni við leyfisveitingar skotvopna og hafði komið að húsleitinni til að bera kennsl á og greina mikinn fjölda vopna á staðnum.
Eftir húsleitina var útbúinn sérstakur listi yfir 44 atriði – skotvopn eða íhluti – sem voru skráð á Guðjón en fundust ekki við leitina.
Skýrsluhöfundur tók að sér að fara yfir öll 44 atriðin og komast að því hvað hefði orðið um þau.
Yfirferðin leiddi í ljós að megnið af tilfellunum átti sér, að mati skýrsluhöfundar, eðlilegar skýringar.
Meðal annars var um að ræða rangar eða úreltar skráningar í skotvopnakerfinu, vopn sem Guðjón hafði sannanlega selt en ekki hafði verið gengið rétt frá eigendaskiptum, vopn sem höfðu verið seld úr landi en héldust áfram á skrá og jafnvel vopn sem höfðu verið á staðnum við húsleitina en lögreglumönnum einfaldlega yfirsést.
Skýrsluhöfundur segir sérstaklega að í þeim tilfellum hafi verið leitað staðfestingar hjá kaupendum og að ekki hafi verið ástæða til að efast um skýringar Guðjóns.
Eftir stóð þó fjöldi atriða sem ekki tókst að loka með sama hætti.
Fimm atriði „óstaðfest“
Í skýrslunni er sérstakur flokkur undir fyrirsögninni „Óstaðfest“.
Þar eru fimm atriði:
- Colt-skiptihlaup sem Guðjón sagði vera á tilteknum riffli en fannst ekki.
- JAKI-hljóðdeyfir sem sagður var vera á sama riffli.
- Black Rain-riffill sem Guðjón sagði seldan en frekari upplýsingar um viðskiptin lágu ekki fyrir.
- Riffill frá 19. öld sem Guðjón sagði líklega hafa verið seldan, en engar nánari upplýsingar fylgdu.
- Ónúmerað Bushmaster-skiptihlaup sem Guðjón sagði vera á öðrum riffli, en ekki var hægt að staðfesta það.
Þessi atriði voru því enn skráð sem óstaðfest þegar Þórarinn lauk skýrslu sinni 21. nóvember 2022.
Fjögur atriði „stemma ekki eða óútskýrð“
Þar með var málinu þó ekki lokið.
Í næsta kafla skýrslunnar notar lögreglan enn sterkara orðalag og flokkar fjögur atriði undir fyrirsögninni:
„Stemmir ekki eða óútskýrt.“
Fyrsta málið varðaði Fabarm-haglabyssu þar sem skráningar- og raðnúmer virtust ekki ganga upp. Skýrsluhöfundur viðurkennir að mögulega hafi hann sjálfur gert mistök við skráningu á vettvangi, en gat ekki staðfest málið og segir það því óútskýrt.
Annað varðaði Hausken-hljóðdeyfi sem Guðjón sagðist hafa selt ákveðnum manni. Við eftirgrennslan kannaðist sá maður ekki við að hafa keypt hljóðdeyfi af Guðjóni. Skýrsluhöfundur segir jafnframt að ruglingur hafi orðið á eintaksnúmeri og að afdrif hljóðdeyfisins væru því óútskýrð.
Þriðja málið varðaði Remington-riffil frá 19. öld. Guðjón taldi þar vera um misskráningu að ræða og vísaði á annað gamalt vopn sem var á staðnum. Lögreglan taldi þá skýringu hins vegar ekki ganga upp, meðal annars vegna þess að um vopn af annarri tegund var að ræða.
Fjórða málið er hvað skýrast orðað.
Það varðaði hálfsjálfvirkan .22 LR Remington-riffil.
Samkvæmt skýrslunni gaf Guðjón engar skýringar á því atriði. Skýrsluhöfundur ræddi við fyrri eiganda vopnsins, sem mundi vel eftir því, en upplýsingarnar leiddu ekki til þess að vopnið fyndist.
Í niðurstöðu skýrslunnar um þetta atriði segir:
„Hvað sem því líður vantar skýringar á því hvar téð vopn er niður komið.“
Rannsóknin síðar felld niður
Málið vakti mikla athygli á sínum tíma.
Fjölmiðlar greindu haustið 2022 frá því að tugir óskráðra vopna hefðu fundist við húsleitina og að mikill fjöldi vopna væri skráður á Guðjón.
Ljósmyndaskýrsla lögreglu frá húsleitinni, sem Nútíminn hefur einnig undir höndum, sýnir umfang safnsins. Þar má meðal annars sjá tugi riffla í tveimur stórum byssuskápum, fjölda skammbyssa og fleiri vopn í sérstakri skotvopnageymslu.
Þrátt fyrir umfang rannsóknarinnar var rannsókn á hendur Guðjóni síðar felld niður, samkvæmt samantekt Vísis um málið sem birtist í júlí síðastliðnum.
Það sem gögnin sem Nútíminn hefur undir höndum svara hins vegar ekki er hvað gerðist með þau níu atriði sem enn voru merkt óstaðfest, stemma ekki eða óútskýrð í skýrslu lögreglu 21. nóvember 2022.
Ekki kemur fram í skýrslunni hvort þau voru síðar staðfest, hvort vopn eða íhlutir fundust, hvort frekari gögn bárust eða hvort þau voru enn óútskýrð þegar rannsókninni var lokað.
Það á meðal annars við um .22 Remington-riffilinn sem lögreglumaðurinn sagði beinlínis að skýringar vantaði á um hvar væri niður kominn.
Spurningar sem enn er ósvarað
Þetta skiptir máli vegna þess að skýrslan var ekki frumathugun frá fyrstu klukkustundum húsleitarinnar.
Hún var skrifuð tæpum tveimur mánuðum síðar, eftir að lögreglumaður sem sérhæfði sig í leyfisveitingum skotvopna hafði farið sérstaklega yfir öll 44 atriðin, skoðað skráningargögn, rætt við kaupendur og fyrri eigendur og heimsótt Guðjón til frekari eftirgrennslanar.
Meginhluta listans tókst honum að skýra.
Níu atriði stóðu hins vegar enn eftir.
Spurningin sem stendur eftir er því einföld:
Hvað varð um þessi níu atriði – og höfðu þau öll verið leyst þegar ákveðið var að fella rannsóknina á hendur Guðjóni Valdimarssyni niður?
