Lögregla í Portúgal handtók á fimmtudag 41 árs gamla franska konu, móður tveggja ungra drengja sem fundust yfirgefnir við þjóðveg nærri ferðamannabænum Comporta í suðurhluta landsins fyrr í vikunni. Drengirnir, fjögurra og fimm ára gamlir, fundust einir og grátandi við vegkant á þriðjudag eftir að vegfarandi kom auga á þá.

Samkvæmt portúgölskum fjölmiðlum voru drengirnir með bakpoka sem innihéldu mat og vatn, en engin skilríki fundust á þeim. Í kjölfarið hófst umfangsmikil leit að móður þeirra sem lauk þegar hún var handtekin í bænum Fatima í miðhluta Portúgals ásamt 55 ára gömlum manni. Þau eru grunuð um vanrækslu, að hafa stofnað börnunum í hættu og yfirgefið þau.

Faðir drengjanna, sem er búsettur í Colmar í austurhluta Frakklands og er skilinn við móður þeirra, hafði tilkynnt þá týnda fyrir um tíu dögum.

Vegfarandinn sem fann drengina, Alexandre Quintas, sagði í samtali við portúgalska miðla að hann hefði farið með þá í bakarí sem fjölskylda hans rekur áður en hann hafði samband við yfirvöld. Þar fengu þeir mat, ís og leikföng á meðan beðið var eftir lögreglu.

Móðir Alexandre, Eugenia Quintas, sagði að frönskumælandi læknir hefði rætt við drengina. Samkvæmt frásögn eldri drengsins höfðu þeir verið með bundið fyrir augun og fengið fyrirmæli um að leita að földu leikfangi. Þegar þeir tóku bindið af sér voru móðir þeirra og bifreið hennar horfin.

Yfirvöld í Frakklandi og Portúgal rannsaka nú málið sameiginlega. Drengirnir eru undir eftirliti á sjúkrahúsi.