Lífið breyttist skyndilega hjá Magnúsi Mána árið 2023 þegar hann veiktist alvarlega. Magnús Máni var og er mikill íþróttamaður en sumarið 2023 þegar hann var þrettán ára missti hann skyndilega allan mátt og skynjun frá bringu og niður. Fjölskyldan var á leiðinni til útlanda en þess í stað blasti spítaladvöl við fjölskyldunni þegar Magnús Máni reyndist vera með bráða mænubólgu.
Sigurbjörg Ýr Guðmundsdóttir og Magnús Helgason, foreldrar Magnúsar Mána, sögðu sögu sína í Heilsuhlaðvarpi Lukku og Jóhönnu Vilhjálms. Dagana áður hafði Magnús fundið fyrir flensueinkennum og bakverkjum.
Sparkaði í bolta á ný
Viku eftir að Magnús lagðist inn á sjúkrahús fékk fjölskyldan þær fréttir að líklegast myndi hann aldrei ganga á ný. Ævilöng dvöl í hjólastól stóð frammi fyrir honum. Sigurbjörg og Magnús segja að fréttirnar hafi verið mikið áfall.
Á sama tíma og þau þurftu að takast á við áfallið hafi þau einnig þurft að takast á við erfiða stöðu í heilbrigðiskerfinu. Magnús Máni hafi farið í endurhæfingu á Grensás en þar hafi annars konar hugarfar mætt þeim en þau áttu að búast við. Endurhæfingin hafi frekar snúist um að „sætta sig við stöðuna eins og hún er“ í stað þess að stefna að stöðugum framförum og bata.
„Þegar óvissan er algjör, þá er vonin það eina sem þú átt og þú verður að halda í hana.“
Sigurbjörg og Magnús segjast þess í stað hafa ákveðið að taka málin í eigin hendur og leituðu liðsinnis hjá Rahul Bharti, indverskum meðferðaraðila, og Peter, pólskum taugasérfræðingi. Áætlunina kölluðu þau Mount Everest-verkefnið en það fól í sér allt frá tíbetskum söngskálum í að grafa hann í sand á ströndinni til að virkja taugakerfið á ný.
Samhliða þessu hafi Magnús Máni einnig sótt hátæknilega taugaendurhæfingu á Spáni. Þar tók hann þátt í stífri þjálfun í 26 vikur með nýjustu vélmennatækni. Foreldrarnir lýsa því að í nýjustu ferðinni hafi Magnús Máni verið spenntur í tæki sem léttir á líkamsþyngdinni og hafi hann þannig sparkað í bolta í fyrsta skipti í þrjú ár.
Stærsti draumurinn að klára golfhring
Þrátt fyrir spár og fréttir um að Magnús Máni myndi aldrei ganga á ný var það einungis hálfu ári síðar sem hann stóð á fætur og setti stjörnuna á jólatré fjölskyldunnar. Hann hafi einnig náð að ljúka tíunda bekk þrátt fyrir að hafa misst úr áttunda bekk vegna endurhæfingarinnar.
Að sögn Sigurbjargar og Magnúsar notaði Magnús Máni einungis göngugrindina í skólanum og geymdi hjólastólinn úti í horni. Þau eru sérstaklega þakklát vinum Magnúsar Mána sem hafa aðstoðað hann við að komast á milli staða. Nú sé stefnan sett á skólagöngu í Verzlunarskóla Íslands í haust.
Almennt gangi Magnús Máni um með göngugrind og æfi sig í að komast um á hækjum. Hann haldi endurhæfingunni áfram til að uppfylla sinn stærsta draum, að ganga óstuddur og spila heilan golfhring.
Tugir milljóna í endurhæfingarkostnað
Heildarkostnaður við endurhæfingu Magnúsar Mána er kominn upp í fjörutíu milljónir króna að sögn foreldranna og standi fjölskyldan að mestu leyti ein í að greiða það. Sjúkratryggingar Íslands hafi greitt um tíu prósent af endurhæfingunni í Spáni þrátt fyrir að sambærileg þjónusta sé ekki í boði á Íslandi.
„Ráðamenn og forstjóri Landspítalans taka vel undir með okkur og eru sammála því að ríkið eigi að styðja betur við okkur, en niðurstaðan úr kerfinu er samt alltaf sú sama: nei.“
Þau áfrýjuðu ákvörðuninni sem var staðfest af úrskurðarnefnd velferðarmála en er málið nú komið á borð umboðsmanns Alþingis.
Yfir sjö milljónir komnar í sjóð
Á síðasta ári hlupu yfir 170 hlauparar sig í hlaupið til að styðja við Magnús Mána, þar á meðal hlaupakonan Elísa Kristinsdóttir. Magnús Máni gekk sjálfur síðustu tvö hundruð metra hlaupsins og yfir endamarkið, studdur af vinum og fjölskyldu.
Þau ætla að endurtaka leikinn í ár til að fjármagna áframhaldandi endurhæfingu Magnúsar Mána. Á heimasíðu áheitasöfnunar fyrir Reykjavíkurmaraþonið eru rétt rúmlega sextíu hlauparar skráðir á áheitasíðu Magnúsar Mána. Þegar þessi grein er skrifuð eru áheitin upp á rúmar sjö milljónir króna.
„Við þurfum öll mótstöðu til að vaxa og þroskast, alveg eins og vöðvi. Magnús á eftir að ná sínum Everest-toppi og við ætlum að standa þétt við bakið á honum alla leið,.“
Bæði Sigurbjörg og Magnús eru meðal hlaupara og ætla þau bæði að fara 10 kílómetra. Hægt er að heita á hlaupara í hópi Magnúsar Mána hér.
