Fyrr í kvöld var Hafnarfjarðarbæ með formlegum og táknrænum hætti afhent lyklavöldin að nýju húsnæði bókasafns bæjarins í verslanamiðstöðinnni Firði og var afhendingin hluti af viðburði með meðal annars tónlistarflutningi. Framkvæmdir við nýja bókasafnið hafa tafist og kostnaður við þær er kominn fram úr áætlun. Bókasafnið er hins vegar ekki tilbúið til notkunar og nýja bókasafnið er því enn án nokkurra bóka og í raun alveg tómt. Fulltrúi úr minnihluta í bæjarstjórn segir það óneitanlega sérstakt að blása til slíks viðburðar vegna bókasafns sem sé enn tómt og að þetta líti þannig út að þetta hafi fyrst og fremst verið gert vegna þess að kosningar eru í nánd. Bæjarstjórinn segir frumkvæðið að viðburðinum hins vegar hafa komið frá Firði og raunar hafi bærinn fyrst átt að fá húsnæðið afhent fyrir tveimur mánuðum en vegna tafa sem hafi orðið sé afhendingin ekki fyrr en núna. Hann segir um látlausa athöfn að ræða sem snúist aðeins um að afhenda bænum húsnæðið svo að hægt sé að innrétta það fyrir bókasafnið og flytja það þangað úr því húsnæði sem það mun nú yfirgefa.
Bókasafn Hafnarfjarðar hefur verið á Strandgötu 1, skamman spöl frá Firði, í fjölda ára en bærinn hefur selt það húsnæði til Verkalýðsfélagsins Hlífar. Bókasafnið mun loka þann 18. maí og reiknað er með að það muni opna í nýja húsnæðinu í júlí næstkomandi.
Á annan milljarð
Nýja bókasafnið verður á 2. hæð Fjarðar og er 1.733 fermetrar en þar af eru um 500 fermetrar nýbyggðir.
Fyrir húsnæðið greiðir bærinn samkvæmt kaupsamningi við Fjörð ehf., eiganda Fjarðar, um 1,1 milljarð króna og átti sú upphæð að taka breytingum miðað við breytingar á vísitölu byggingarkostnaðar. Samkvæmt minnisblaði sem lagt var fyrir fund bæjarráðs í gær hefur um 1 og hálf milljón króna bæst við kaupverðið vegna hækkunar vísitölunnar.
Samkvæmt minnisblaðinu mun bærinn ráðast í ýmsar framkvæmdir við bókasafnið.
Bærinn mun greiða um 22 milljónir króna fyrir meðal annars baðherbergi lagfæringu og parketlögn
Bærinn greiddi einnig 15,9 milljónir fyrir sinn hlut í hönnun safnsins og alls mun það kosta bæinn 42,8 milljónir króna að innrétta bókasafnið með t.d. húsgögnum og hillum.
Því bætist um 80 milljóna króna framkvæmdakostnaður við kaupverðið sem bærinn greiðir. Miðað við minnisblaðið bætast einnig við 50,2 milljónir vegna glerveggja við rúllustiga, breytta milliveggi frá skilalýsingu og tæki í eldhúsinnréttingu en miðað við minnisblaðið greiðir Fjörður ehf síðasttöldu upphæðina.
Fram kemur í minnisblaðinu að sé þessum framkvæmdakostnaði bætt við kaupverðið sé heildartalan komin upp í 1,3 milljarða króna sem sé sem mjög svipað og áætlun gerði ráð fyrir. Það liggur fyrir að kostnaðurinn sé kominn fram úr áætlun en það er ekki tekið fram í minnisblaðinu hver hin upprunalega áætlun var og því örðugt að átta sig á hve framúrkeyrslan sé mikil en miðað við þetta hefur nýja bókasafnið kostað bæinn að minnsta kosti um 80 milljónir króna til viðbótar við kaupverðið en væntanlega hefur verið gert ráð fyrir að eitthvað myndi kosta að innrétta bókasafnið.
Ekki að frumkvæði bæjarins
Fyrr í kvöld afhenti Fjörður ehf. Valdimar Víðissyni bæjarstjóra Hafnarfjarðar, fyrir hönd bæjarins, lyklavöldin að nýja bókasafninu. Lykillinn í formi gagnalykils en á nýja safninu á meðal annars að leggja aukna áherslu á stafræna miðlun. Lykillinn var afhentur klukkan 18:45 en á vefsíðu Hafnarfjarðarbæjar var afhendingin kynnt og bætt við að opið verði til 21:00 og Bylgjan verði á staðnum. Fyrstu 100 gestirnir hafi fengið gjafapoka frá kl. 18. Tilboð sé í verslunum og vörukynningar og boðið var upp á skemmtiatriði með Bjarni Ara, Elvis Presley eftirhermu og Maríu og Sjonna.
Valdimar sagði í samtali við DV fyrir afhendinguna að verið væri að afhenda bænum húsnæðið til að hægt sé að koma bókasafninu þar á laggirnar, með því að leggja parket á gólfið og innrétta það. Fjörður hafi verið með lengri opnunardag og forsvarsmenn hans ákveðið að afhenda bænum lyklavöldin með þessum hætti við þetta tækifæri. Hann muni taka við lyklinum fyrir hönd bæjarins og afhenda hann áfram til forstöðumanns bókasafnsins.
Bókasafnið nýja er eins og áður segir ekki tilbúið til notkunar, þar eru t.d. engar bækur í hillum og reiknað er með að það opni í júlí næstkomandi. Það virðist því skjóta eiltíð skökku við að blása til slíkrar afhendingar tveimur mánuðum áður en safnið tekur til starfa á nýjum stað. Valdimar segir að Fjörður hafi stungið upp á deginum í dag til afhendingarinnar. Upphaflega hafi bærinn átt að fá húsnæðið afhent í byrjun maí og þar áður raunar í byrjun mars. Það hafi síðan verið hugmynd forsvarsmanna Fjarðar að afhenda lyklavöldinn í dag á þessum lengri opnunardegi en venjulega í verslanamiðstöðinni en í því samhengi ber að minnast að frídagur er á morgun.
Kosningar
Á laugardaginn verður blásið til sveitarstjórnarkosninga og Valdimar segist skilja það að það geti litið þannig út að ákveðið hafi verið að blása til afhendingarinnar með þessum hætti fyrst og fremst vegna kosninganna en hann er í oddvitasætinu á lista Framsóknarflokksins:
„Ég skil alveg hvað þú meinar,“ segir Valdimar en leggur áherslu á að þar sem hafi legið fyrir að Fjörður gæti loks afhent húsnæðið nú um miðjan maí hafi frumkvæðið að því hvernig hún skyldi fara fram komið þaðan. Það sé ekki verið að opna bókasafnið formlega heldur afhenda húsnæðið og leyfa síðan bæjarbúum að skoða það. Hann þvertekur fyrir að hann eða einhver annar hjá bænum hafi sérstaklega haft frumkvæði að því blása til afhendingarinnar svo skömmu fyrir kosningar:
„Alls ekki. Þetta var ekki sett svona upp við áttum að fá þetta eins og ég sagði fyrst í byrjun í mars, svo í byrjun maí og svo seinkaði því fram í miðjan maí.“
Valdimar ítrekar að það hafi verið hugmynd Fjarðar að nýta daginn í dag, sem sé með lengri opnunartíma en venjulega vegna uppstigningardags á morgun, til að afhenda bænum húsnæðið með þessum hætti. Hann bætir því við að samið hafi verið um þennan dag á milli starfsfólks bæjarins og Fjarðar, eftir uppástungu forsvarsmanna Fjarðar, og hann sjálfur ekki komið nálægt því að ákveða dagsetningu afhendingarinnar.
Menningarhús
Valdimar segir kostnaðinn við nýja bókasafnið hafa farið fram úr áætlun meðal annars vegna öryggisatriða sem hafi þurft að bæta við, til að mynda glerinu í rúllustiga en framúrkeyrslan sé ekki það mikil að hún geti ekki talist vera innan eðlilegra marka. Hann segir að þegar komi loks að opnun nýja bókasafnsins verði hún mun veglegri en afhendingin nú í kvöld sem sé tiltölulega látlaus.
Það á síðan eftir að koma í ljós hver verður orðinn bæjarstjóri í Hafnarfirði þegar safnið verður opnað í sumar. Valdimar líst mjög vel á hvernig nýja safnið verður. Hann segir að það verði með glæsilegri bókasöfnum landsins og verði í raun meira eins og menningarhús en í nýja safninu verður lögð aukin áhersla á til að mynda viðburði, margmiðlun og að nýja safnið nýtist fyrir fólk til að koma saman. Þarna verði ekki eingöngu bækur:
„Þetta er svona erlendis eins og Björgvin Halldórsson sagði þegar var eitthvað fínt.“
Einkennileg tímasetning
Árni Rúnar Þorvaldsson er bæjarfulltrúi Samfylkingarinnar í Hafnarfirði og annar af fulltrúum flokksins í bæjarráði. Í bókun á bæjarráðsfundi sögðu fulltrúar flokksins um þau gögn sem lögð voru fram um framkvæmdirnar á fundinum:
„Þau staðfesta umtalsverðan kostnað við framkvæmdina og að verkið sjálft er á eftir áætlun í tíma, og mun bókasafnið á nýjum stað í Firði ekki opna fyrr en síðar í sumar. Þrátt fyrir það er blásið til „opnunarhátíðar “ í Firði þremur dögum fyrir kosningar í framtíðarhúsnæði bókasafnsins. Þar verða engar bækur, engin starfsemi, en uppgert húsnæði.“
Árni Rúnar, sem er í 3. sæti á lista Samfylkingarinnar í Hafnarfirði í kosningunum á laugardaginn, í segir í samtali við DV að honum finnist það óneitanlega sérstakt að blása til slíks viðburðar svo skömmu fyrir kosningar:
„Þetta er fyrst og fremst sérstakt og tímasetningin mjög sérstök. Þremur dögum fyrir kosningar að vera blása til svona viðburðar með bókasafn þar sem engar bækur eru komnar. Bókasafn með engum bókum, mjög sérstakt. Þetta lyktar af því að verið sé að gera þetta til að búa til fréttir fyrir kosningar.“
Fréttamaður upplýsti Árna Rúnar um þau svör Valdimars að frumkvæðið að því að afhenda lyklavöldin með þessum hætti í dag, hefði komið frá Firði. Árni Rúnar segistist ekki hafa heyrt þær skýringar fyrr og minnist þess ekki að þær hafi verið ræddar á fundi bæjarráðs, þar sem Samfylkingin gagnrýndi eins og áður segir tímasetninguna með bókun. Hann var þó ekki tilbúinn til að fullyrða að það hefði ekki verið nefnt á fundinum hvaðan frumkvæðið að þessum viðburði hefði komið en ítrekaði að það væri sérstakt að blása til svona viðburðar rétt fyrir kosningar vegna bókasafns þar sem ekkert væri klárt. Þær tafir sem hafi orðið á framkvæmdunum og að sú staðreynd þær hafi farið fram úr kostnaðaráætlun varpi einnig óneitanlega sérstöku ljósi á viðburðinn.
Árna Rúnari líst hins vegar vel á hvernig safnið á að vera og eru hann og Valdimar því að minnsta kosti sammála um það:
„Það verður skemmtilegt og til mikilla bóta fyrir Bókasafn Hafnarfjarðar. Það er ekki nokkur spurning,“ sagði Árni Rúnar að lokum.
