Ný bæjarstjórn á Akureyri á eftir að taka við völdum og mun gera það í byrjun næsta mánaðar en á meðan halda ráð og nefndir bæjarins, eins og þau voru skipuð á því kjörtímabili sem nú tekur enda, áfram starfi sínu. Bæjarráð samþykkti á fundi sínum í gær ósk lögreglustjórans á Norðurlandi eystra um að drónar verði notaðir til löggæslu í Hrísey og Grímsey, sem eru hluti af Akureyrarbæ. Leitað verður þó til annarrar ríkisstofnunar til að fjármagna verkefnið.
Í bréfi Páleyju Bergþórsdóttur lögreglustjóra á Norðurlandi Eystra til Akureyrarbæjar segir að embættið hafi í samstarfi við ákveðnar sveitarstjórnir í umdæminu hafi verið komið upp neti af fjarstýrðum löggæsludrónum sem komið hafi verið varanlega fyrir í hýsingum. Bæjarráð Akureyrarbæjar hafi samþykkt aðkomu sína að því tilraunaverkefni haustið 2025 og hafi verið gengið frá uppsetningum á tveimur löggæsludrónum á Akureyri þar sem embættið hafi ákveðið að bæta við öðrum dróna á Akureyri vegna stærðar bæjarins og umfangs verkefna. Góð reynsla sé komin á notkun drónanna sem fyrsta viðbragðs. Embættið hafi verið leiðandi í þessu frumkvæðisverkefni á landsvísu ásamt embætti lögreglustjórans á Höfuðborgarsvæðinu og embætti Ríkislögreglustjóra og nýverið hafi borist fréttir um sambærilega uppsetningu hjá lögregluyfirvöldum í Noregi.
Myndarlega
Segir enn fremur að Akureyrarbær hafi í gegnum árin komið myndarlega að uppbyggingu löggæslumyndavéla í miðbæ Akureyrar og víðar og verið fordæmi fyrir önnur sveitarfélög um samstarf með lögreglu um uppsetningu og reksturs slíks búnaðar. Sé það mat lögreglu að sá búnaður hafi frá upphafi nýst mjög vel í því skyni að viðhalda öruggu samfélagi. Embættið telji að löggæsludrónar sem fjarstýrt sé frá lögreglustöðvum séu gagnleg viðbót við löggæslumyndavélakerfið og vilji með þessu erindi leggja það til að verkefnið verði útvíkkað með þeim hætti að það nái einnig til Hríseyjar og Grímseyjar og að horfið verði frá fyrri hugmyndum um að koma upp föstum löggæslumyndavélum þar.
Páley vill meina að löggæsludrónar gætu nýst afar vel á jafn einangruðum stöðum og byggðir í Hrísey og Grímsey séu þar sem löggæsla sé ekki á staðnum árið um kring. Áætlaður kostnaður við að bæta tveimur drónum til viðbótar sem staðsettir yrðu í Hrísey og Grímsey sé um 3,7 milljónir króna á hvorum stað. Innifalið sé þá kostnaður við kaup á drónunum, leyfisgjöld fyrir hugbúnaðinn, og 4g sendingabúnaðar. Vinna við rafmagn og smíði festinga sé ekki innifalið í þeirri fjárhæð. Kostnaður við þjálfun, mönnun, árlegan leyfiskostnað og reksturs miðlægs netþjóns falli á lögreglu. Óski embættið eftir því að Akureyrarbær komi frekar að verkefninu í því skyni að stórbæta löggæslu og viðbragð í Hrísey og Grímsey með því að kaupa dróna til uppsetningar þar.
Bæjarráð samþykkti erindið á fundi sínum í gær en fól bæjarstjóra að óska eftir styrk frá Byggðastofnun vegna verkefnisins. Það er ekki tekið fram í fundargerð hvort farið verði fram á styrk fyrir allri upphæðinni sem Páley óskaði eftir að bærinn legði til. Það er einnig ekki tekið fram hvort fráfarandi bæjarstjóri, Ásthildur Sturludóttir, muni ná að koma þessari styrkbeiðni á framfæri við Byggðastofnun áður en hún lætur af störfum í lok mánaðarins.
