Páll Vilhjálmsson skrifar:

Kristrún forsætis og Þorgerður Katrín utanríkis afþökkuðu tækifæri að sýna sig saman á fundi með Alexus Grynkewich yfirmanni herafla Bandaríkjanna í Evrópu og yfirhershöfðingi Nató. Tíu dagar eru í þjóðaratkvæðagreiðslu sem mun hafa áhrif á samskiptin við Bandaríkin ekki síður en við Evrópusambandið.

Ráðherrarnir Kristrún og Þorgerður Katrín segja ekki sömu söguna um utanríkisstefnu Íslands og gátu illa átt sameiginlegan fund með yfirmanni Bandaríkjahers í Evrópu. Hvor ráðherra átti sinn fund með herforingjanum.

Í viðtengdri frétt segir forsætisráðherra að sambandið við bandaríska herinn og bandarísk stjórnvöld ,,sé það mikilvægasta fyrir Íslendinga." Fast er að orði kveðið, ekkert rými er fyrir ESB í lofræðu Kristrúnar um hvað sé í forgangi utanríkismála Íslands.

Þorgerður Katrín utanríkisráðherra á hinn bóginn leggur ofuráherslu á tengsl við Evrópusambandið. Þjóðaratkvæðagreiðsla í þágu Viðreisnar gengur út á að færa Ísland af áhrifasvæði Bandaríkjanna yfir á forræði Evrópusambandsins.

Þorgerður Katrín réttlætti í vor þjóðaratkvæðagreiðsluna með þeim rökum að deilur Bandaríkjanna við Dani og ESB um Grænland væri meginástæða fyrir stefnu utanríkisráðherra að ganga til aðlögunarviðræðna við Evrópusambandið.

Utanríkisráðherra og ráðherrar Viðreisnar ala á ótta við Bandaríkin í von um að auka fylgið við ESB-málstaðinn. Síðast í gær skrifaði Þorbjörg dómsmálaráðherra Viðreisnar grein í Morgunblaðið til að árétta að „ógn stafi af Bandaríkjunum."

Á meðan Kristrún forsætisráherra mærir sambandið við Bandaríkin í bak og fyrir standa ráðherrar Viðreisnar, með Þorgerði Katrínu í fararbroddi, fyrir áróðursherferð gegn Bandaríkjunum. Á Vísi tekur Kristrún undir með bandaríska herforingjanum að gott mál sé að Trump Bandaríkjaforseti hafi ,,opnað umræðuna" um stöðu Grænlands í varnar- og öryggismálum. Sama ,,opna umræðan" er höfuðröksemd Þorgerðar Katrínar að Ísland skuli leita á náðir Evrópusambandsins. Í skrifum Þorbjargar Viðreisnarráðherra er ,,opin umræða" túlkuð sem bandarísk ógn.  

Það er ekki aðeins þjóðin sem klofin er í herðar niður vegna þjóðaratkvæðagreiðslu í þágu Viðreisnar. Í ríkisstjórninni sitja ráðherrar ekki á sátts höfði, Bandaríkjavinir annars vegar og hins vegar ESB-sinnar. Hér er ekki um að ræða léttvægan áherslumun. Evrópusambandið hyggst styrkja stöðu sína á Norður-Atlantshafi á kostnað Bandaríkjanna. Ísland er lykilríki í valdataflinu.

Gagnólík sjónarmið í ríkisstjórn landsins um grundvallaratriði í utanríkismálum þjóðarinnar er feigðarboði, bæði fyrir stjórnarsamstarfið og innanlandsfriðinn. Erfiðustu deilurnar í íslenskum stjórnmálum stafa af utanríkismálum.

Segi kjósendur nei eftir tíu daga verður komið í veg fyrir pólitískt stórslys. Þjóðin þarf að hafa vit fyrir ráðlausri landsstjórn.