Hátt í helmingur kvenna í blaða- og fréttamennsku segist ástunda sjálfsritskoðun á samfélagsmiðlum vegna stafræns ofbeldis og ríflega tuttugu prósent kveðst gera það við störf sín.
Þetta kemur fram í nýrri greiningarskýrslu UNWomen, rannsóknarfréttaveitunnar TheNerve og fleiri, sem varpar ljósi á háþróað stafrænt ofbeldi sem konur í opinberum stöðum mega þola.
Það beinist ekki síst gegn konum sem starfa við fjölmiðla en einnig að þeim sem berjast fyrir mannréttindum og öðrum aðgerðarsinnum. Skýrslan afhjúpar að ofbeldið er vísvitandi og skipulagt til að grafa undan trúverðugleika og orðstír kvenna.
Áhrifin séu augljós, þegar horft er til allra kvenna ritskoða rúmlega fjórar af hverjum tíu hvað þær segja á samfélagsmiðlum til að komast hjá svívirðingum og 45 prósent fjölmiðlakvenna.
Það er fimmtíu prósenta fjölgun frá árinu 2020. Alls segja 19 prósent allra kvenna stafrænt ofbeldi hafa leitt af sér sjálfritskoðun í vinnunni og næstum 22 prósent þeirra sem starfa við fjölmiðla.
Sex prósent kvenna segjast vera fórnarlömb djúpfalsana og næstum ein af hverjum þremur kveðst hafa fengið kynferðisleg skilaboð gegnum samskiptaforrit. Tólf prósent segja persónulegum ljósmyndum af sér og jafnvel kynferðislegum hafa verið dreift án leyfis.
Jákvætt þykir að konur eru tvöfalt líklegri nú til að tilkynna stafrænt ofbeldi til lögreglu en var árið 2020 og næstum fjórtán af hundraði hafa höfðað mál gegn gerendum og þeim sem styðja ofbeldið samanborið við átta prósent fyrir sex árum.
Ofbeldið hefur tekið sinn toll af heilsu og vellíðan kvenna. Næstum fjórðungur fjölmiðlakvenna sem tóku þátt í rannsókninni kváðust hafa greinst með kvíða og þunglyndi af völdum þess og næstum þrettán af hundraði sögðust glíma við áfallastreituröskun.
Gervigreind gerir ofríkið bæði auðveldara og illskeyttara að mati Kalliopi Mingerou hjá þeirri deild UN Women sem berst fyrir því að ofbeldi gegn konum linni. Brýnt sé að öll kerfi og löggjöf bregðist við þessum aðkallandi vanda af mikilli hörku.
Innan við 40 prósent ríkja hafa innleitt lög sem vernda konur fyrir stafrænni áreitni og eltihrellum. Það þýðir að um það bil 1,8 milljarður, um 44 prósent allra kvenna og stúlkna, nýtur ekki verndar laganna í heimalöndum sínum.
