Lögreglurannsókn í Bretlandi sýnir að tveggja barna móðir á miðjum aldri lést eftir að hafa pantað sér „sjálfsvígspakka“ í póstinum. Konan hafði barist við andlega erfiðleika.
Breska dagblaðið The Daily Star greinir frá þessu.
Konan, hin 44 ára Jane Colechin, lést um áramótin árið 2024 eftir að hafa tekið efni sem hún pantaði í póstinum. Rannsóknin á dauða hennar er hluti af víðtækari rannsókn lögreglunnar í London á téðu efni, sem er ekki nefnt, en hefur verið kallað „sjálfsvígspakki“. Að minnsta kosti fimm hafa látist eftir að hafa innbyrt það.
Missti starfið
Jane, starfaði fyrir góðgerðasamtök og var lýst sem ástríkri, klárri og hvatvísri konu. Hún og maki hennar, Sean Gleeson, áttu saman tvíburasyni fædda árið 2017.
Jane hafði hins vegar barist við kvíða mjög lengi. Þessi kvíði jókst til muna eftir að hún missti starf sitt. Það var um það leyti sem hún virtist missa tökin og fór að leita að leiðum til að enda líf sitt.
Vildi að synirnir færu með
Sean hafði farið að heimsækja vinafólk sitt um áramótin í Hertfordshire, norðan við London. Jane krafðist þess að hann tæki synina með og sagði að hún yrði miður sín ef þeir fengju ekki að hitta vini sína. Sean vissi af andlegum erfiðleikum Jane en taldi að ástand hennar væri að skána.
Þegar Sean sneri til baka á nýársdag að heimili þeirra í austurhluta London svaraði Jane ekki. Hann bað nágranna um að passa strákana og leitaði í húsinu. Fann hann Jane loks meðvitundarlausa í kjallaranum. Hann hringdi á sjúkrabíl sem kom á þremur mínútum en það var allt of seint. Hún var látin.
Kanadískur maður til rannsóknar
Lík Jane var krufið og kom í ljós að gildi eins tiltekins eiturefnis voru 46.860 sinnum hærri en í heilbrigðum einstaklingi. Ljóst var að þetta hafði dregið hana til dauða.
Þegar farsími Jane var skoðaður kom í ljós að hún hafði leitað eftir þessu efni á netinu. Þá hafði hún farið inn á síðu sem seldi „sjálfsvígspakka“ og pantað efnið heim að dyrum með venjulegum bréfpósti. Vefsíðan er á vegum kanadísks manns sem er nú til rannsóknar lögreglu.
Pósturinn skoðar ekki í pakka
Vitað er að að minnsta kosti fimm manns hafa dáið eftir að hafa tekið efnið. Þar á meðal Zara Ampong Appiah, 30 ára gömul kona sem starfaði sem sálfræðingur. Talið er þó að dauðsföllin séu miklu fleiri. Jafn vel hátt í hundrað talsins.
Breska póstþjónustan, The Royal Mail, segist harma málið en þeir hafi ekki leyfi til þess að opna pakka og skoða innihaldið. Segja talsmenn póstþjónustunnar hins vegar að samstarf við lögregluna, tollgæslu og aðrar stofnanir sé mikið og að allir grunsamlegir pakkar séu tilkynntir.
Í þessari frétt er fjallað um þunglyndi og sjálfsvíg. Ef einstaklingar glíma við sjálfsvígshugsanir er bent á Hjálparsíma Rauða krossins 1717 og netspjall Rauða krossins 1717.is. Opið allan sólarhringinn. Einnig má hafa samband við Píeta-samtökin sem veita ókeypis ráðgjöf í síma 552-2218, allan sólarhringinn. Netspjall Heilsuveru þar sem svarar hjúkrunarfræðingur er líka opið frá kl.8-22 alla daga. Fyrir þau sem misst hafa ástvin í sjálfsvígi má fá stuðning í sorg hjá Sorgarmiðstöð og hjá Pieta samtökunum.
