„Hér er uppgangurinn slíkur að það er lyginni líkast. Þegar ég byrjaði 2020 voru líklega 120 manns í klúbbnum. Við erum að detta í 1100 núna,“ segir Helgi Dan Steinsson, framkvæmdastjóri Golfklúbbs Grindavíkur.
Lækkuðu gjaldið og straumurinn liggur til Grindavíkur
Golfsprengjan margumrædda hefur heldur betur náð til Grindavíkur.
„Hér er meira og minna kjaftfullt alla daga, alltaf. Við erum búnir að fjárfesta, vélarkost á við það sem best gerist, fyrir æfingasvæðið. Já, það er þvílíkur uppgangur.“
Helgi segir að þetta séu mikil viðbrigði en á sínum tíma, þegar bærinn var tómur vegna jarðeldanna, var ekki gert ráð fyrir því að nein umferð yrði á vellinum. Menn varpa nú öndinni léttar.
„Það er rétt. Við erum í sérstakri aðstöðu. Við erum að reka golfklúbb en það býr enginn í sveitarfélaginu. Ekki í raun og veru. Við gripum til þess að lækka gjaldið um fimmtíu prósent, úr 90 þúsund krónum í 44.900 krónur. Og það virðist hafa dugað,“ segir Helgi.
Brosir stafnanna á milli
Hann segir reksturinn nú í góðu lagi. Þau séu vissulega ekki að fá fólk á hverjum degi í golf, fólk þurfi að gera sér ferð hingað.
„Sá sem lék flesta hringi árið 2023 fór hringi, 120 hringi, en í fyrra lék sá sem fór oftast 40 hringi, sem er reyndar frábær ástundun en þetta segir sína sögu. Við getum tekið á móti góðum fjölda fólks án þess að það sé að sprengja klúbbinn. Það hefur verið gríðarlega góður gangur í þessu hjá okkur, það verður að segjast.“
Helgi segir það líka hjálpa að fólk komist ekki í klúbb í Reykjavík, sem reyndar eru áhöld um hvernig það vill verkast.
„En við brosum stafnanna á milli. Þeir sem eru að koma í klúbbinn eru glaðir með það sem við erum að gera. Þetta eru ekki allt saman sorgarsögur úr golfinu á Íslandi.“
