Ræða sem Karl III Bretakonungur flutti í bandaríska þinginu í gær virðist hafa slegið í gegn ef marka má erlenda miðla. Konungurinn vitnaði í Wilde, Dickens, Roosevelt og fleiri fyrirmenni og hlaut oftar en einu sinni standandi lófatak. Hann lagði áherslu á samband Bretlands og Bandaríkjanna sem hann sagði ómissandi.
Meistaranámskeið í „minna er meira“
Karl er fyrsti breski konungurinn til að halda ræðu á Bandaríkjaþingi, nákvæmlega 250 árum eftir að Bandaríkin lýstu yfir sjálfstæði. Hann fékk höfðinglegar viðtökur á þinginu og tóku þingmenn og ráðherrar á móti honum með dynjandi lófataki.
BBC segir hann hafa fengið standandi lófatak tólf sinnum. Þingmenn og áhorfendur hafi oft klappað og risið úr sætum meðan á ræðunni stóð.
Hann fór yfir víðan völl í ræðunni og minntist strax í upphafi á þá víðsjáverðu tíma sem heimurinn stendur frammi fyrir og þá óvissu sem ríkir. Hann minntist á stríðin bæði í Mið-Austurlöndum og Evrópu en líka þá ógn sem að lýðræðinu steðjar með og tók dæmi um árásina á galakvöldverði sambands bandarískra fjölmiðla í Hvíta húsinu um helgina.
„Slík ofbeldisverk munu aldrei ná árangri.“
Í umfjöllun Davids Smiths, yfirmanns skrifstofu The Guardian í Washington D.C., um ræðu konungs bendir hann á að Karl hafi ekki nefnt Íran eða Ísrael, né minnst beint á innflytjendur eða loftslagsmál eða annað sem hefur verið umdeilt í forsetatíð Trumps.
„Í stað þess hélt konungurinn einstaklega vel skipulagt meistaranámskeið í „minna er meira“ þar sem hann lagði áherslu á sameiginleg tengsl þjóðanna sem ná miklu lengra aftur Trump og - vonandi" - eiga eftir að endast lengur hann sjálfur.“
Karli var tíðrætt um samband Bandaríkjanna og Bretlands. Litið hefur verið á opinbera heimsókn konungs sem eins konar björgunaraðgerð. Samband ríkjanna hefur verið stirt upp á síðkastið og á konungur að milda samskiptin.
„Tengslin milli Bandaríkjanna og Bretlands, sem byggjast á skyldleika og sjálfsmynd, eru ómetanleg og eilíf. Þau eru óbætanleg og órofin,“ sagði Karl í ræðunni.
Þjóðirnar tvær hafi ekki alltaf verið sammála um allt. „Með anda ársins 1776 í huga getum við kannski verið sammála um að verið um ekki alltaf sammála.“
En þegar þjóðirnar eru sammála og standa saman geti þær áorkað miklu. „Ekki aðeins í þágu þjóða okkar heldur allra þjóða,“ sagði Karl.
Stuðningur við NATO og Úkraínu
Konungur minntist einnig á NATO, mikilvægi bandalagsins og viðbrögð þess eftir hryðjuverkaárásirnar 11. september 2001.
„Þegar fimmta grein sáttmála NATO var virkjuð í fyrsta skipti og Öryggisráð Sameinuðu þjóðanna sameinaðist gegn hryðjuverkum svöruðum við kallinu saman, eins og okkar fólk hefur gert í rúmlega öld.“
Karl sagði heimsstyrjaldirnar tvær, kalda stríðið, stríðið í Afganistan og aðriar stunir hafa skilgreint sameiginlegt öryggi þjóðanna. „Í dag er sami vilji og einbeitni nauðsynleg til að verkja Úkraínu og hugrakka íbúa hennar.“
Sló á létta strengi
Konungurinn sló á létta strengi í ræðunni og uppskar hlátrasköll. Hann hóf ræðuna á að vitna í skáldið Oscar Wilde. „Við eigum í raun allt sameiginlegt með Bandaríkjunum nú til dags, nema auðvitað tungumálið!“
Hann grínaðist einnig með þá aldagömlu hefð í breska þinginu að halda þingmanni í gíslingu í Buckingham-höll meðan konungurinn flytur stefnu ræðu sína í breska þinginu í Westminster. Hann varpaði upp spurningu hvort einhver þingmanna Bandaríkjaþing hefði boðist til að sinna því hlutverki meðan hann flytti ræðu sína.
Karl minntist einnig á Georg þriðja, sem var konungur þegar Bandaríkin hlutu sjálfstæði, og langalangalangalangafi Karls, og fullvissaði þingmenn um að heimsóknin væri ekki lævís leið til þess að endurreisa bresk yfirráð í landinu.
„Hafið ekki áhyggjur, ég er ekki hérna sem hluti af einhverri lævísri leið til að endurreisa bresk yfirráð.“
Beittur en forðaðist að móðga
Karl var líka beittur en forðaðist að móðga forsetann eða aðra stjórnmálamenn. Hann minnti þingmenn á að orð og gjörðir Bandríkjanna á alþjóðasviðinu hafi þýðingu, og hafi haft hana síðan landið varð sjálfstætt.
„Gjörðir þessarar stórþjóðar skipta enn meira máli.“
Karl yfirgaf þingsalinn með handaböndum frá þingmönnum og bros á vör.
Erlendir miðlar eru sammála um að ræðan hafi heppnast vel. Smith hafði einfaldlega eitt að segja í lok fréttarinnar um ræðu konungs: „Markmiðinu náð“.
„Órólegt hvílir höfuðið sem ber kórónuna en þökk sé snjöllum ræðuskrifum og heilli bók af tilvitnunum kom konungurinn vonandi sjónarmiðum sínum á framfæri án þess að kalla fram eldheit viðbrögð frá brjálaða einvaldinum á Truth Social,“ sagði Smith og vitnaði þar í Trump og skrif hans á samfélagsmiðilinn.
The Telegraph sagði konunginn eina breska leiðtogann sem Trump taki mark á en að merking skilaboða hans hafi kannski týnst í þýðingu milli þessara vinaþjóða.
Sean Coughlan, konunglegur fréttaritari breska ríkisútvarpsins, BBC, sagði ræðuna stærstu diplómatísku stund konungs á valdatíma hans. „Þetta var stærsta diplómatíska stund á valdatíma hans, með vaxandi pólitíska spennu milli Bandaríkjanna og Bretlands í bakgrunni, og að lokum fékk hann standandi lófatak áður en hann hóf ræðuna.“
