„Kannanirnar voru rangar“ - Vísir

Þeir Chuck Schumer, leiðtogi Demókrata í öldungadeildinni, og Hakeem Jeffries, væntanlegur þingforseti fulltrúadeildarinnar, hafa einnig lofað hundrað daga áætlun sem er meðal annars ætlað að lækka verðlag í Bandaríkjunum og snúa við niðurskurði í sjúkratryggingum og heilbrigðisþjónustu.

Demókratar unnu stórsigur í kosningunum í gær og tryggðu sér meirihluta í báðum deildum bandaríska þingsins. Þeir hafa tryggt sér að minnsta kosti 54 öldungadeildarsæti af hundrað en enn eru úrslit kosninga í tveimur ríkjum óráðin.

Þá er útlit fyrir að Demókratar muni ná í það minnsta 250 sætum í fulltrúadeildinni. Það er mun meira en kannanir höfðu gefið til kynna.

Jeffries byrjaði blaðamannafund sinn í dag á því að stæra sig af sigri Demókrata.

„Mike Johnson [leiðtogi Repúblikana í fulltrúadeildinni] hafði rétt fyrir sér. Kannanirnar voru rangar,“ sagði Jeffries á blaðamannafundi í dag.

„Það var engin blá bylgja. Þetta var bandarísk flóðbylgja.“

Þá gaf Jeffries til kynna að Demókratar hefðu móttekið skilaboðin frá kjósendum.

„Við munum vinna hörðum höndum að því að ná fram þeim miklu breytingum sem þið eigið skilið.“

Þá sagði Jeffries að hann teldi að Demókratar myndu ná að minnsta kosti 255 þingsætum í fulltrúadeildinni, sem væri sögulegur árangur. Hann sagði kjósendur hafa kallað eftir breytingum og að Demókratar myndu svara kallinu.

Áhugasamir geta horft á hluta blaðamannafundar Jeffries í spilaranum hér að neðan.

Spilltasti forseti Bandaríkjanna

Chuck Schumer, leiðtogi Demókrata í öldungadeildinni, hélt einnig blaðamannafund nú undir kvöld. Hann fagnaði árangri Demókrataflokksins og sagðist hafa fimm orð til að færa bandarísku þjóðinni [fjögur á íslensku]:

„Hjálpin er á leiðinni.“

Schumer rifjaði það upp að þegar hann sagði í fyrri að Demókratar ættu möguleika á því að ná meirihluta í öldungadeildinni hafi fólk hvolft augunum. Hann sagði að Demókratar hefðu haldið í þá trú og unnið að þessu markmiði. Sú vinna hefði skilað árangri.

„Hvað olli þessari breytingu?“ spurði Shcumer.

Hann sagði frambjóðendur Demókrata hafa unnið sem eina heild fyrir kosningarnar og að skilaboð þeirra til kjósenda hefðu verið skýr og markviss. Þeir hefðu hlustað á áhyggjur kjósenda og lofað að bregðast við þeim.

Hann sagði hátt verðlag hafa verið helsta áhyggjuefni kjósenda og að spilling Trumps hefði verið í öðru sæti.

„Við vissum að hann var spilltasti forsetinn í sögu Bandaríkjanna, með miklum mun, og að fólk hataði það.“

Schumer sagði að kjósendur vissu að Demókratar væru með þeim í liði og að þeir hefðu fundið frábæra frambjóðendur fyrir kosningarnar, sem hefðu kunnað að tjá sig um málefni kjósenda sinna.

Þá sagði hann að nú þyrftu Demókratar að standa við stóru orðin og sagði að það myndu þeir gera. Nefndi hann meðal annars rannsóknir á Trump og embættismönnum hans.

Demókratar í dómsmálanenfd fulltrúadeildarinnar auglýstu í dag eftir rannsakendum og öðru starfsfólki til að aðstoða þá.

Blaðamannafund Schumers má sjá í spilaranum hér að neðan.

Trump segist ekki hafa haft aðra kosti en stríð

Repúblikanar standa frammi fyrir því að þurfa að komast til botns í því hvað klikkaði hjá þeim og finna sér fótfestu á nýjan leik, ef svo má segja. JD Vance varaforseti birti langa færslu í dag þar sem hann sagði að stríðið gegn Íran hefði haft mikil áhrif á niðurstöðurnar.

Aðrir hafa sagt að Repúblikanar hafi ekki rætt nógu vel við kjósendur um það hvað hagkerfi Bandaríkjanna væri í raun stöðugt og hvað fólk hefði það gott.

Donald Trump Bandaríkjaforseti ræddi við blaðamenn á sjöunda tímanum í kvöld. Þá sagðist hann frekar sammála JD Vance um að Repúblikanar hefðu tapað kosningunum vegna stríðsins gegn Íran. Þess vegna hefði eldsneytisverð „hækkað lítillega“.

Þá sagðist Trump ekki sjá eftir neinu og ef hann gæti farið aftur í tímann myndi hann samt hefja stríðið aftur.