Breski auðjöfurinn Jim Ratcliffe notaði einkaþyrlu sína til að komast örstuttan spöl á skotsvæði sitt á Vopnafirði. Þetta kemur fram í útvarpsþættinum Þetta helst á RÚV í dag.

Ratcliff hefur sett mark sitt á Vopnafjörð og sveitina í kring frá því að hann hóf að stunda fjárfestingar á svæðinu en fyrirtæki hans, Six Rivers er meðal annars leigutaki laxveiðiánna Selár og Hofsár í Vopnafirði, auk annarra laxveiðiáa á norðausturhorninu. Þá er hann einnig stór landeigandi á svæðinu en hann á um 1,4 prósent af flatarmáli Íslands.

Undanfarin ár hafa staðið yfir miklar framkvæmdir við einkahús Ratcliffs í Ytri-Hlíð í Vesturárdal og við nýtt veiðihús við Hofsá.

Bjartur Aðalbjörnsson sveitarstjórnarmaður á Vopnafirði sagði frá áhugaverðu atviki í viðtali í þættinum, þar sem hann lýsir því þegar fjölskylda hans var í fjallgöngu upp á hina svokölluðu Sjónvarpshæð við kaupstaðinn í Vopnafirði þegar Ratcliffe flaug nokkurra kílómetra leið frá húsinu sínu og á einkaskotsvæði sitt sem er þar nokkru utar í firðinum.

„Það lýsir svo vel held ég þessari dýnamík á milli Ratcliffs og vopnfirskrar alþýðu, sagan af því þegar einn góður drengur var í sunnudagsfjallgöngu með fjölskyldunni og þau stoppuðu og fengu sér nesti. Dóttir hans var að berjast við að troða papparörina ofan í kókómjólkurfernuna á meðan að þau horfðu á Ratcliffe taka af stað á þyrlunni sinni í Ytri-Hlíð og fljúga nokkra kílómetra á skotsvæði sitt. Og ég held að þetta segi kannski alla söguna um það hvernig þetta er í heiminum, þeir ríkustu komast upp með allt saman en það er alþýðan sem þarf að borga brúsann.“

Bjartur útskýrir málið betur:

„Hann flaug frá Ytri-Hlíð og út eftir við Skógarlón svokallað en þar er jörð sem hann á þar sem hann er með skotsvæði. Það er nú eitt, þarna gátu nú Vopnfirðingar farið og æft sig að skjóta en eftir að hann keypti jörðina breytti hann því einkasvæði fyrir sig,“ segir Bjartur en aðspurður hvað auðjöfurinn skjóti á svæðinu svarar Bjartur:

„Hann er bara að æfa sig. Hann fer þangað og æfir sig áður en hann fer á rjúpnaveiðar. Og það er þannig að þegar hann fer á rjúpnaveiðar, þá er passað upp á að auglýsa það að fólk sé ekki velkomið á jarðirnar hans á rjúpnaveiðar.“ Áður fyrr tíðkaðist það að veiðimenn á Vopnafirði fengu leyfi til að veiða rjúpur á því landi sem nú er undir eign Ratcliffs en nú er öldin önnur.

Bjartur heldur áfram með söguna af þyrluflugi Ratcliffs.

„Grenadier-jeppinn hans hefur ekki verið nógu góður fyrir þessa nokkra kílómetra, það er betra að fara á þyrlunni,“ og á þá við jeppa sem fyrirtæki Ratcliffs, Ineos framleiðir. Bætir hann við að lokum að Vopnfirðingar taki lítið eftir sjálfur Ratcliffe en heyri oft í þyrlu hans.

„Það er nú þannig, satt best að segja, að við vitum lítið af sjálfum Jim Ratcliffe, hann einhvern veginn svífur bara skýjum ofar hérna. Það er helst að maður heyri í þyrlunni þegar hún er að fara yfir þorpið. En fyrir alþýðu Vopnafjarðar þá hefur hann rosalega lítil áhrif á þeirra daglega líf.“