Enn og aftur hefur umræðan um hátt verðlag á Íslandi dúkkað upp hjá erlendum ferðamönnum. Íslendingar eru sakaðir um græðgi og þó að landið sé vissulega fallegt þá sé það ofmetið.
„Ísland hefur fullkomnað þá list að kreista hverja krónu úr ríkum ferðamönnum. Mér sem Hollending blöskrar/er hrifinn,“ segir hollenskur ferðamaður í kaldhæðnistón í umræðum á samfélagsmiðlum um verðlag á Íslandi. En verðlag í Hollandi er með því hæsta í heiminum.
900 krónur til að skoða gíg
Hefur færsla hans fengið mikil viðbrögð og yfir milljón manns hafa lesið hana. Langsamlega flestir taka undir með honum og segja verðlagið á Íslandi glæpsamlegt.
„Viltu leggja bílnum út í rassgati til að sjá einn gíg, það gera 7 dollara takk,“ segir einn. En sjö dollarar eru næstum því 900 krónur.
Sjá einnig:
Börnin fá ekki að upplifa Ísland eins og hann fékk að gera – Orðið allt of dýrt að ferðast innanlands
„Ég gleymi aldrei 350 dollara leigubílaferðinni minni frá flugvellinum,“ segir annar. Það jafngildir litlum 43 þúsund krónum.
„Maturinn er 50 prósentum dýrari en í Amsterdam,“ segir einn og annar bendir á að fyrir utan að vera höfuðborg eins dýrasta lands í Evrópu þá er Amsterdam líkt og Ísland gríðarlega mikill ferðamannastaður.
Koma ekki aftur
Sumir segja Íslendinga alveg sama þó þeir okri á ferðamönnum. Það er vegna þess að flestir ferðamenn fari aðeins þangað í eitt skipti.
„Þú færð einn bita af eplinu, þeir vita að þú kemur ekki aftur,“ segir einn.
Myndu selja börnin sín
Íslendingar sjálfir taka meira að segja undir með Hollendingnum sem og útlendingar sem búa hérna.
Sjá einnig:
Ferðamaður sér eftir að koma til Íslands – „Þetta er hávær, niðurdrepandi, ljótur og dýr staður“
„Ég er íslenskur og ég get ekki lengur farið á veitingastaði eða ferðast um landið mitt út af þessum gráðugu bastörðum sem stjórna hverjum krók og kima hérna,“ segir hann. „Ekkert er heilagt lengur. Ég get ekki beðið eftir að útlendingar hætti að láta bjóða sér þetta og hætti að koma þangað til þessir andskotar læra.“
„Ég er búinn að búa á Íslandi í fimmtán ár og vinn í þessum bransa. Þig grunar ekki hversu sjúklega gráðugir Íslendingar geta verið. Þeir myndu selja börnin sín fyrir skjótunnin gróða,“ segir innflytjandi.
Ekki einsdæmi
Ekki taka hins vegar allir undir með Hollendingnum eða þá benda á að nágrannalöndin, svo sem Færeyjar og Noregur séu einnig mjög dýr fyrir ferðamenn að heimsækja. Verðlagið á Íslandi sé ekki einsdæmi.
„Hvað ertu að tala um? Þú þarft bara að leigja bíl og restin er að mestu leyti ókeypis. Þú keyrir bara um og nýtur náttúrunnar,“ segir einn bjartsýnn.
