Tíu Íslendingar eru í erfiðleikum á Alicante á Spáni eftir að hafa leigt húsnæði af leigufélagi sem er í eigu íslensks fyrirtækis sem komið er í greiðslustöðvun. Guðrún Svava Pálmarsdóttir er 65 ára gömul kona sem leigði íbúð á Play Flamenca á Alicante af leigufélaginu Sólarmegin. Þegar hún kom út til Spánar í byrjun mánaðarins kom hins vegar í ljós að hún fengi ekki íbúðina, segir hún í samtali við fréttastofu. Hún segist hafa greitt 2500 evrur, eða 360.000 krónur, fyrir íbúðina nú í apríl.
Níu aðrir Íslendingar eru í sömu sporum og hún á Spáni, segir Guðrún Svava.
Eigandi leigufélagsins er Samúel Jón Samúelsson. Hann segir í samtali við fréttastofu að þetta sé staðan og að fyrirtæki hans á Íslandi sé komið í þrot. Samúel segist vera að vinna í því að aðstoða þá Íslendinga sem hann var búinn að leigja íbúð áður en fyrirtæki hans fór í þrot. Aðspurður um hvort hann ætli sér að endurgreiða þessu fólki leiguverðið segir Samúel að það standi til. Að öðru leyti vísar Samúel á lögmann sinn. Samtals er um að ræða nokkrar milljónir króna.
Alicante á austurströnd Spánar er vinsæll ferðamannastaður meðal Íslendinga og hefur verið í áratugi. Fjölmargir Íslendingar eiga þar íbúðir og eru ýmsir, sérstaklega eldra fólk, sem dvelja þar í marga mánuði yfir vetrartímann.
Hafði safnað sér fyrir fríinu og greitt leiguna
Í tölvupóstum á milli Guðrúnar Svövu og Samúels kemur þessi staða fyrirtækis hans fram. Íslenskt móðurfélag Sólarmegin, Sammlind ehf., sé komið í greiðslustöðvun.
Í tölvupósti til Samúels síðastliðin laugardag lýsti Guðrún Svava gremju sinni með stöðuna og hvernig Sólarmegin hafi komið fram við hana.
Hún sagði þar orðrétt: „Ég ákvað að leigja af þér íbúð hér á Playa Flamenca, sem þú bauðst mér eftir að ég auglýsti eftir íbúð til dvalar í tvo mánuði hér á Spáni. Langþráð frí og búin að safna fyrir þessu. Þú hafðir getið þér góðs orðspors hér og ég taldi mig vera í 100% góðum höndum. Ég á ekki til orð til að lýsa tilfinningum mínum í dag því ég veit ekki hvernig mér líður, veit það allavega að ég get ekki notið dvalarinnar því ég veit ekkert hvað mun verða um mig eftir miðvikudaginn. Ég hefði aldrei trúað því að þetta myndi henda mig og alls ekki af þér. Það getur ýmislegt komið fyrir hjá öllum en gerðu ekki öðrum það sem þú vilt ekki að aðrir geri þér.“
Guðrún Svava segir í viðtali að hún hafi fengið afnot af annarri íbúð á Alicante í eina viku eftir að hún kom til Spánar í síðustu viku. Frá og með deginum í dag sé hún hins vegar húsnæðislaus og að eigandi leigufélagsins hefði sagt henni að hann gæti ekkert meira gert fyrir hana.
Eigendaskipti á leigumiðluninni
Guðrún Svava segir að henni hafi verið sagt að leigumiðlunin á Spáni hafi nú fengið nýjan eiganda vegna fjárhagserfiðleika íslenska móðurfélagsins. Hún segir að henni hafi verið sagt að nýi eigandinn ætlaði sér hins vegar ekki að standa við skuldbindingar félagsins sem stofnað var til fyrir eigendaskiptin.
Í tölvupósti til Guðrúnar Svövu á laugardaginn lýsti Samúel stöðunni fyrir henni og að til stæði að reyna að endurgreiða henni leiguverðið.
Orðrétt segir í póstinum: „Ég var að reyna að segja þér stöðuna í gær og að þú yrðir áfram í þessari íbúð. Sem segir að þrátt fyrir allt er ég að gera allt til að tryggja þig. En fyrst svona er þá er þetta staðan.
Ég er búinn að vera á fundi með lögfræðingi mínum á Spáni.
Það liggur ljóst fyrir að ég er kominn í þrot með þetta.
Sólarmegin er komið með nýja eigendur sem tengjast Sammlind ehf ekki á nokkurn hátt en Sammlind ehf rak og átti merkið Sólarmegin. [...]
Sammlind ehf hefur verið sett í greiðslustöðvun af lögfræðingum okkar á Íslandi og munum við reyna að fá það endurgreitt sem við getum til að skila til baka. Ég hef reynt fram á síðustu stund að bjarga öllu en þetta er staðan.
Ég læt þetta nægja í bili eins og við aðra.“
Í ársreikningi eignarhaldsfélagsins Sammlindar ehf. sem nú er komið í greiðslustöðvun kemur fram að félagið hafi verið með neikvætt eigið fé upp á tæplega fjórar milljónir í árslok 2024. Skuldir félagsins upp upp á 35 milljónir króna voru þá meiri en eignir þess. Félagið var á þessu ári rekið með tæplega tveggja milljóna króna tapi.
