Inga Sæland mennta- og barnamálaráðherra segist ekki hafa vitað af aðstæðum barna með fjölþættan vanda sem lýst var í Kveik í gær. Hún segir það síðustu sort að einkavæða þjónustu við börn í vanda.
Einkarekin búsetuúrræði fyrir börn með fjölþættan vanda voru til umfjöllunar í Kveik í gær og þar kom meðal annars fram að dæmi eru um að reynt sé að lágmarka þjónustuna til að hámarka hagnað og að lítið sem ekkert eftirlit sé með starfseminni.
Er í algeru áfalli
„Ég verð að segja það: ég er í algeru áfalli. Þetta er enn einn áfellisdómurinn yfir kerfi sem er ekki að virka,“ segir Inga Sæland mennta- og barnamálaráðherra.
Að einkavæða þjónustu yfirhöfuð við fólk og börn í viðkvæmri stöðu er náttúrulega bara í mínum huga síðasta sort.
Nú ert þú ráðherra barnamála. Vissir þú ekki af þeim aðstæðum sem þarna eru og lýst er í þættinum? „Nei, Gæða- og eftirlitsstofnun [velferðarmála] heyrir náttúrulega ekki undir mig, heldur Barna- og fjölskyldustofa, að vísu. Þarna er ábyrgð barnaverndaryfirvalda algjör sem setja börnin í þessa vistun. En ég skorast ekki undan ábyrgð sem barnamálaráðherra.“
Þjónustan fer yfir til ríkisins
Þjónusta við börn með fjölþættan vanda færist alfarið yfir til ríkisins um áramótin og öllum samningum sveitarfélaganna við einkareknu heimilin var sagt upp fyrr í ár. Komið er vilyrði fyrir húsnæði á höfuðborgarsvæðinu og Inga er bjartsýn á að það gangi eftir.
Þegar hefur 21 barn fengið mat til að fá svokallaða þriðja stigs þjónustu sem verður veitt á þessum nýju heimilum.
Vill leggja Stuðla af
„Ég hef séð fyrir mér að við séum með fjármagn og getu til að taka allt að 34 börn,“ segir ráðherra.
Dugar það? „Ég get ekki betur séð. Ég vil leggja Stuðla af. Þessir miklu fjármunir sem var gert ráð fyrir að yrðu settir í enn frekari endurbætur á Stuðlum; ég óskaði eftir því strax í vor að þeim fjármunum yrði vísað beinustu leið í hraðari og öruggari uppbyggingu á meðferðarkjarnanum okkar í Garðabæ.“
Eigum að koma í veg fyrir einkarekstur, segir ráðherra
Ríkið hefur fengið úthlutað lóð fyrir meðferðarheimili fyrir börn með fjölþættan vanda við Vífilsstaðavatn og þar verður byggt hús sem verður sérstaklega hannað með þarfir þeirra í huga. Þar verður hægt að aðskilja börnin og vista þau við mismiklar öryggisráðstafanir eftir þörfum þeirra.
Framkvæmdin verður boðin út á næsta ári. „Mér finnst við eiga að taka betur saman höndum og koma algerlega í veg fyrir einkarekstur á þessari þjónustu við börnin okkar,“ segir Inga.
Ráðuneyti Ingu og Félagsmálaráðuneytið ræða nú samlegðaráhrif Gæða- og eftirlitsstofnunar velferðarmála og Barna- og fjölskyldustofu.
Hafa barnaverndaryfirvöld og Gæða- og eftirlitsstofnun velferðarmála brugðist? „Já. Ég myndi segja það,“ segir Inga.
