Nýjar upplýsingar um hinn 18 ára gamla mann sem grunaður er um mannskæða sveðjuárás í sænskum framhaldsskóla benda til þess að hann hafi haft mikinn áhuga á fyrri fjöldamorðum og skólárásum og mögulega sótt beina fyrirmynd í alræmda sveðjuárás í Trollhättan árið 2015.
17 ára stúlka lést og þrír drengir særðust þegar maður vopnaður sveðju réðst inn í Brinellskolan í Fagersta í Svíþjóð síðdegis föstudaginn 21. ágúst. Tveir drengjanna særðust alvarlega en sá þriðji hlaut vægari áverka.
Hinn grunaði, 18 ára fyrrverandi nemandi skólans, var handtekinn á vettvangi og er grunaður um morð og tilraunir til morðs.
Mynd af sveðju birt 25 mínútum fyrir árásina
Sérstaka athygli rannsóknarlögreglu vekur nú TikTok-reikningur sem talinn er tengjast hinum grunaða.
Klukkan 13:41 á föstudag birtist þar mynd af sveðju. Aðeins 25 mínútum síðar, klukkan 14:06, barst lögreglu neyðarkall vegna þess sem hún skilgreindi sem „yfirstandandi banvænt ofbeldi“ í Brinellskolan.
Sænska ríkisútvarpið, Sveriges Radio, greinir frá því að áður en reikningnum var lokað hafi þar meðal annars verið að finna færslur með vísunum í sveðjusárásina í Trollhättan, norska fjöldamorðingjann Anders Behring Breivik og fjöldaskotárásina í Risbergska-skólanum í Örebro árið 2025.
SVT segir að sami reikningur hafi áður birt efni sem túlka megi sem upphafningu á ofbeldisverkum. TikTok-reikningurinn var fjarlægður skömmu eftir árásina að beiðni lögreglu og sænska lögreglan rannsakar nú tengsl hans við hinn grunaða.
Reuters greinir jafnframt frá því að lögregla rannsaki hvort árásarmaðurinn hafi orðið fyrir áhrifum frá netsamfélögum þar sem skólárásir og fjöldamorð eru upphafin.
Sláandi líkindi við sveðjuárásina í Trollhättan
SVT greinir nú frá því að rannsóknin beinist meðal annars að því hvort hinn 18 ára gamli maður hafi sótt fyrirmynd til Anton Lundin Pettersson, sem framdi eina alræmdustu skólárás í sögu Svíþjóðar.
Lundin Pettersson gekk inn í Kronan-skólann í Trollhättan árið 2015, vopnaður sveðju og klæddur svörtum fötum, hjálmi og grímu. Þrír létust af völdum árásarinnar áður en lögregla skaut hann til bana.
Líkindin við árásina í Fagersta eru áberandi.
Samkvæmt upplýsingum SVT var hinn grunaði í Fagersta sömuleiðis svartklæddur, með grímu og hjálm og vopnaður sveðju þegar hann fór inn í skólann. Heimildir SVT herma að hann kunni sérstaklega að hafa sótt innblástur í Lundin Pettersson og útlit hans við árásina árið 2015.
Þúsundir fylgdust með efni um fjöldamorðingja
Sænski miðillinn Riks náði að skoða TikTok-reikninginn áður en honum var lokað og segir að hann hafi haft meira en 3.500 fylgjendur.
Miðillinn segir reikninginn hafa innihaldið fjölda myndbandsklippa þar sem þekktir fjöldamorðingjar og skólárásarmenn voru í forgrunni. Skömmu fyrir árásina hafi auk þess verið birt mynd af sveðju í gítartösku ásamt skilaboðunum „No more edits“.
Lögreglan hafði þá ekki staðfest að reikningurinn væri í eigu hins grunaða og neitaði að tjá sig um einstök rannsóknargögn. Síðan hafa bæði SVT og Sveriges Radio greint frá því að lögregla rannsaki reikninginn og möguleg tengsl hans við árásarmanninn.
Málið varpar jafnframt kastljósi á netsamfélög þar sem ungir notendur útbúa svokölluð „edits“ — stutt, mikið klippt myndbönd um fjöldamorðingja og skólárásarmenn, gjarnan með tónlist og dramatískri framsetningu.
Lögregla hefur þó ekki enn birt niðurstöðu um hvað hafi verið aðalhvöt árásarinnar.
Hafði áður verið dæmdur fyrir ofbeldi
Hinn grunaði var ekki óþekktur yfirvöldum.
SVT hefur staðfest að hann hafi áður verið dæmdur fyrir líkamsárás á annan nemanda. Hann hafði einnig verið vistaður utan heimilis á grundvelli sænsku LVU-laganna um vernd barna og ungmenna.
Samkvæmt gögnum sem SVT hefur skoðað ólst maðurinn upp í sveitarfélagi í Västernorrland. Félagsþjónustan þar taldi alvarlega annmarka vera á heimilisaðstæðum hans og var hann að lokum vistaður á fósturheimili í Fagersta.
Í úrskurði vegna málsins er æsku hans lýst sem mótaðri af langvarandi skorti á fullnægjandi umönnun.
Hann hafði síðar verið nemandi í Brinellskolan, sama skóla og hann sneri aftur í vopnaður sveðju á föstudag.
Lögregla rannsakar netheim árásarmannsins
Sænska lögreglan vinnur nú að því að kortleggja nákvæmlega hvað gerðist fyrir og meðan á árásinni stóð, hver hvöt mannsins hafi verið og hvaða áhrif netefni og fyrri skólárásir kunni að hafa haft á hann.
Lögregla hefur jafnframt varað við útbreiðslu óstaðfestra upplýsinga á samfélagsmiðlum meðan rannsókn málsins stendur yfir.
Það sem þegar liggur fyrir sýnir þó óhugnanlega atburðarás: TikTok-reikningur sem lögregla rannsakar birti mynd af sveðju 25 mínútum áður en neyðarkallið barst, þar höfðu birst vísanir í nokkur alræmd fjöldamorð og hinn grunaði mætti síðan í skólann í klæðnaði og með vopn sem minna mjög á sveðjuárásina í Trollhättan ellefu árum áður.
Ein 17 ára stúlka lét lífið og tveir drengir liggja alvarlega særðir eftir árásina. Hinn 18 ára gamli grunaði situr í haldi vegna gruns um morð og tilraunir til morðs.
