„Hvernig dílar maður við gamla freka karla?“
Kristinn Árni Lár Hróbjartsson er viðskiptafræðingur með mikinn áhuga á tónlist og hefur á ferli sínum meðal annars starfað hjá Plain Vanilla, Gangverki og alþjóðlega uppboðshúsinu Sotheby's. Síðastliðið haust stofnaði hann, ásamt frumkvöðlinum Davíð Helgasyni, hugveituna Vörðu sem einbeitir sér að málefnum tengdum þjóðaröryggi og viðnámsþrótti samfélagsins. Varða stendur reglulega fyrir viðburðum og umræðu á þessu sviði. Í sumar stóð hugveitan jafnframt fyrir sinni fyrstu alþjóðlegu ráðstefnu hér á landi, Reykjavik Security Forum.
Í ítarlegu viðtali við Mannlíf opnar hann sig um margskonar málefni meðal annars stöðu Íslands í öryggismálum.
Gamlir frekir karlar
Heimsmyndin er breytt. Staðsetning Íslands má segja mitt á milli Evrópu og Bandaríkjanna getur í sumum tilfellum verið góð, svo sem þegar kemur að málefnum norðurslóða og má nefna væntanlega umskipunarhöfn á Austurlandi, en svo er ekki alltaf.
„Fyrir öryggishagsmuni Íslands er óheppilegt að þetta sé orðið hernaðarlegt áhugamál stórvelda. Það væri betra fyrir okkur ef það væri áfram frosið á norðurslóðum og enginn að pæla í þessu. Ég tala stundum um að við séum að fara frá því að vera eins og brú á milli tveggja vinveittra stórvelda - Bandaríkjanna og Evrópu - og yfir í að vera hringtorg óvinveittra stórvelda. Ég held að það sé ekki endilega frábært fyrir okkur að vera hringtorg. Ef við horfum á hernaðarbröltið hjá stórveldunum og síðan loftslagsbreytingarnar og mögulegar hamfarir tengdum þeim þá þarf ekki mikið að fara úrskeiðis til að þetta endi illa.
Í fyrstu skýrslunni sem við gáfum út fórum við yfir skemmdarverk Rússa á innviðum í Evrópu - við vorum að vekja athygli á því að í raun er allt sem þarf til þess til staðar á Íslandi. Við erum með dreifða innviði, við erum með gamla innviði og við erum með aðgengilega innviði og það þarf skipulagða glæpahópa sem hægt er að fjarstýra í gegnum Telegram eða borga þeim í bitcoin fyrir að gera eitthvað rugl. Það er hér allt til staðar og nóg af því. Það skortir væntanlega vilja til að gera eitthvað. Það hefði ekkert upp á sig ímynda ég mér en það væri ekki mikið mál að setja allt á annan endann á Íslandi.
Við vitum að það hafa verið allavega tvær skipulagðar netárársir af hendi Rússa á Íslandi - í tengslum við leiðtogafund Evrópuráðsins 2023 og svo Fréttablaðið þegar í því birtist mynd af úkraínskum hermönnum að stappa á rússneska fánanum í kringum stríðið. Þetta er ekkert sérstaklega flókið - það eru bara vondir karlar þarna úti - mesmegnis karlar sem eru 70+ virðist vera - sem eru með allt aðra hugmynd um hvernig heimurinn á að virka heldur en við. Það er það sem skiptir máli í þessu finnst mér. Og hvernig dílar maður við gamla freka karla? Við þurfum að geta passað upp á okkar út frá því sem skiptir okkur máli.“
