Karlmaður var fluttur á bráðamóttöku Landspítalans með alvarlega áverka eftir hnífsstungu í heimahúsi í Árbæ í Reykjavík síðdegis í dag. Upplýsingar um líðan hans liggja ekki fyrir.
Annar maður var handtekinn og vistaður í fangaklefa.
Lögreglan getur ekki greint frá aðdraganda árásarinnar fyrr en búið er að taka skýrslu af mönnunum, segir Garðar Stefánsson aðalvarðstjóri hjá lögreglunni á höfuðborgarsvæðinu. Maðurinn sem var handtekinn er sagður hafa verið í annarlegu ástandi og er grunur um að hann hafi verið undir áhrifum vímuefna.
Enginn annar hafi verið í húsinu þegar árásin var gerð. Aðdragandinn liggi ekki fyrir.
Garðar segir árásina hafa verið tilkynnta til lögreglu skömmu fyrir klukkan fjögur. Lögregla sé enn að ná utan um málið. Skýrslur verði teknar af mönnunum eins fljótt og auðið er.
