Jón Breki Jónas Jónasson féll frá langt fyrir aldur fram án nokkurra skýringa þegar hann var nýorðinn 20 ára gamall.
Fjölskylda og vinir Jóns Breka hafa stofnað hlaupahóp í hans nafni og ætla að hlaupa saman til styrktar Konukoti í Reykjavíkurmaraþoni Íslandsbanka þann 22 ágúst.
Konukot átti stóran stað í hjarta Jóns Breka og var hann alltaf sérstaklega stoltur af störfum móður sinnar þar.
„Engin útskýring nema að svona geti bara gerst“
Á páskadag 2025 borðaði Jón Breki með fjölskyldu sinni, talaði um hvað hann væri spenntur fyrir ferð til Kaupmannahafnar sem hann var á leið í nokkrum dögum síðar og fór glaður að sofa, en vaknaði ekki aftur.
„Hann varð ekki var við neitt sjálfur. Þetta gerðist bara í svefni og engin útskýring nema að svona geti bara gerst,“ segir móðir Jóns Breka, Klara Lind Jónasson. Hann hafi verið fílhraustur og fjölskyldunni verulega þungbært að fá engin svör.
„Hann lét alltaf alla drauma sína rætast og lifði lífinu alltaf til fulls. Hann hefur örugglega gert meira á sinni allt of stuttu ævi en margir sem fá að lifa eðlilegt lífskeið, ef svo má að orði komast. Hann beið aldrei eftir að eitthvað myndi gerast, hann bara gerði hlutina.“
„Hann var góðkunningi Konukots“
Spurð hvers vegna Konukot hafi orðið fyrir valinu segir Klara Lind að vinur Jóns Breka, sem hafi verið honum mjög kær, hafi fyrir nokkrum mánuðum deilt því með henni að hann hefði byrjað að hlaupa eftir að Jón Breki féll frá og að hann vildi hlaupa maraþon í hans minningu til styrktar Konukoti.
„Mér þótti þetta svo fallegt. Hann vissi að Jón Breki var svo stoltur af því að ég væri að vinna þarna,“ segir Klara Lind.
„Jón Breki þekkti Konukot, hann var góðkunningi Konukots. Honum þótti auðvitað allt mikilvægara í lífinu en að vera með húslykla og við búum bara rétt hjá Konukoti þannig að hann var alltaf að koma þangað og fá lykla að heimilinu ef hann gat ekki skriðið inn um opna glugga eða eitthvað. Hann var mjög hugfanginn af þessum málaflokki og þótti þetta svo fallegt.
Þessi vinur hans sagði mér að hann hefði ákveðið að styrkja Konukot. Mér þótti það svo fallegt og ég hugsaði: af hverju get ég ekki gert þetta fyrir drenginn minn? Ég hef aldrei hlaupið en mig langar að gera þetta.“
Stúkan Sportbar ætlar að gera boli
„Það eru svo rosalega margir sem ætla að hlaupa með okkur, og sem hafa haft samband við mig sem vilja hlaupa með okkur,“ segir Klara Lind þakklát.
Vinkona Jóns Breka, Julía Guðný Sae jung, hafi búið hlaupahópinn til eftir að Klara Lind sagði henni frá hugmyndinni og nú hafi fjölskyldumeðlimir, vinir og samstarfsmenn úr Gallerí 17 bæst í hópinn, en þar starfaði Jón Breki sem samfélagsmiðlastjóri. Hann hafði djúpa ástríðu fyrir tísku og ljósmyndun og setti alla sína orku og sýn í þessi skapandi svið.
„Sportbarinn Stúkan á Hverfisgötu frétti af þessu og eigandinn hafði samband og vildi endilega gera boli fyrir okkur öll,“ bætir Klara Lind við. Eigandinn, Arnar Hólm Sigmundsson, ætli einnig að hlaupa með hópnum.
„Lét öllum líða eins og þeir væru mikilvægustu einstaklingarnir“
„Síðan er endalaust að safnast í hópinn. Það er fullt af fólki sem vill heiðra hann og hans minningu. Það vilja allir gera allt fyrir hann því hann gerði allt fyrir alla. Hann var ljós í lífi rosalega margra. Það eru allir að byrja að æfa sig og ætla bara að gera sitt besta,“ segir Klara Lind enn fremur.
„Þetta er svona bittersweet fyrir mig. Á sama tíma og þetta er svo fallegt þá er þetta mikill sársauki. En þetta verður gert og þetta á bara eftir að vaxa og vaxa og verða fallegra og fallegra. Hann hafði svo mikil áhrif á svo marga. Hann var gleðigjafi allra og lét öllum líða eins og þeir væru mikilvægustu einstaklingarnir í lífinu.“
