Reykjavíkurborg, Hjallastefnan og fasteignafélagið Reitir skrifuðu undir viljayfirlýsingu í dag um að Reitir byggi leik- og grunnskóla og leigi Hjallastefnunni.
„Þetta er hátíðisdagur, algjör hátíð í okkar bæ. Hjallastefnan með leik- og grunnskólann okkar í Öskjuhlíð sem er búið að vera að þróa í 18 ár. Við erum í fyrsta skipti komin í varanlegt skjól,“ segir Margrét Pála Ólafsdóttir stofnandi Hjallastefnunnar.
Leikskólinn Askja hóf starfsemi 2009 á Nauthólsvegi 87 og starfaði þar í þrettán ár áður en hann vék fyrir stúdentaíbúðum Háskólans í Reykjavík. Síðan þá hefur hann verið á hrakhólum.
Fyrr á þessu ári hvatti sviðsstjóri skóla- og frístundasviðs í Reykjavík forsvarsfólk Hjallastefnunnar til að setja sig í samband við fasteignafélagið Reiti sem hygðist byggja upp lífsgæðakjarna við Nauthólsveg.
Skólinn byggður á bílastæðalóð
Guðni Aðalsteinsson, forstjóri Reita, segir mikið standa til.
„Fyrsta skrefið er að við erum búin að fá samþykkt að byggja 150 íbúðir fyrir þau sem eru sextíu ára og eldri og svo fyrir elsta aldurshópinn þá erum við að umbreyta skrifstofum, sem voru áður skrifstofur Icelandair hérna á bak við mig, yfir í hjúkrunarheimili. Síðasti kannski hlekkurinn í þessari keðju er samstarfið við Hjallastefnuna þar sem yngsta kynslóðin kemst inn á svæðið.“
Skólinn verður byggður á bílastæðalóð við Reykjavík Natura Berjaya-hótelið á Nauthólsvegi. Á lóðinni við hlið hans rísa íbúðir fyrir 60 ára og eldri.
Og hvernig verður þá með bílastæðamál?
„Bílastæðamál, þau munu leysast. Það verða bílastæði hér, kannski ekkert allt of mörg en þau verða, bak við hótelið fyrir hótelgesti og auðvitað verða einhver bílastæði og aðkoma fyrir leikskólann og grunnskólann,“ segir Guðni.
Margrét Pála segir staðsetninguna góða og ekki þurfi stór útivistasvæði í kringum skólann þar sem stutt sé í náttúruperlur í Öskjuhlíð.
Hyggst endurskoða samninga borgarinnar við sjálfstætt starfandi skóla
Hildur Björnsdóttir borgarstjóri segir Reykjavík ætla að styðja við framtakið í þeim skipulagsmálum sem fram undan eru.
„Núna eru það auðvitað skipulagsmálin sem eru framundan að hér verði skipulagt á þessari lóð og við þurfum að styðja þau í því. Við erum auðvitað líka með það almennt á okkar stefnuskrá að endurskoða samninga borgarinnar við sjálfstætt starfandi skóla til þess að styrkja þeirra rekstrargrundvöll þannig að við munum fara ofan í saumana á því líka,“ segir Hildur.
