„Mér líst ekkert svakalega vel á þær,“ segir Gylfi Ólafsson, bæjarstjóri í Ísafjarðarbæ, um tillögur að því að breyta skiptingu þingsæta.
Tillögurnar ganga bæði út á að tryggja jafnvægi milli atkvæðafjölda og skiptingar þingsæta á milli flokka og að fjögur þingsæti færist úr Norðaustur- og Norðvesturkjördæmi í Suðvesturkjördæmi til að jafna vægi atkvæða.
Gylfi segist skilja röksemdafærsluna en líst ekki vel á að fáum þingmönnum Norðvesturkjördæmis fækki enn frekar. Rætt var við hann á Morgunvaktinni á Rás 1.
„Heilt yfir leggst þetta ekki vel í mig.“
Gylfi segir stóra samhengið felast í því að það sé ekki bara Alþingi sem stjórni Íslandi heldur verði líka að líta til framkvæmdavalds og dómsvalds. Framkvæmdavaldið sé allt á höfuðborgarsvæðinu, sömuleiðis Hæstiréttur og höfuðstöðvar flestra stórra ríkisstofnana.
„Það hefur verið stirt að fá höfuðstöðvar stofnana út á land eða hafa störf stofnana úti á landi og þá sogast þetta smám saman til Reykjavíkur.“
Hann segir að ekki aðeins sé stór hluti ríkisstarfa á höfuðborgarsvæðinu heldur líka stór hluti best launuðu starfanna.
„Ég myndi frekar vilja taka þetta í stóra samhenginu: Hvar er stjórnkerfi Íslands? Það er allt mjög þungt á höfuðborgarsvæðinu. Eðlilega, höfuðborgin er höfuðborgin samkvæmt skilgreiningu.“
Gylfi segir að aðeins sé horft á lítinn hluta af stóru myndinni með því að líta bara á þingmannafjöldann. Hann lýsir þeirri von að stjórnmálamenn geti rætt þetta á víðari grundvelli.
Aðspurður hvort ástæða væri til að breyta kjördæmum segir Gylfi ekki heppilegt að minnka kjördæmin. Hætt væri við að sumir flokkar væru ekki í tengslum við viss kjördæmi ef þeir kæmu þar aldrei þingmönnum að vegna smæðar kjördæmanna.
Hann segir tengsl íbúa og þingmanna skipta miklu máli og kjördæmi séu góð að því leyti.
