Benjamin Netanyahu, forsætisráðherra Ísraels, segir að ísraelski herinn ráði nú yfir 60 prósentum af Gasasvæðinu, sem bendir til þess að hersveitir hafi farið inn á stærra svæði á landsvæði Palestínumanna en gert var ráð fyrir í vopnahlésáætlun frá því í október.

Ummæli hans koma á sama tíma og daglegt ofbeldi heldur áfram að hrjá íbúa Gasa og tilraunir til að koma á viðkvæmu vopnahléi og binda enda á stríðið fyrir fullt og allt virðast hafa stöðvast.

„Undanfarin tvö ár höfum við sýnt öllum heiminum hversu voldugur kraftur býr í þjóð okkar, ríki okkar, her okkar og arfleifð,“ sagði Netanyahu í gær á viðburði í tilefni af Jerúsalem-deginum.

„Við komum öllum gíslum okkar heim, allt til þess síðasta,“ bætti hann við og vísaði til eins helsta yfirlýsta markmiðs stríðsins á Gasa. „Sumir sögðu: Farið út, farið út! Við fórum ekki út. Í dag stjórnum við 60 prósentum, á morgun sjáum við til.“

Samkvæmt skilmálum vopnahlésins milli Ísraels og Hamas, sem Bandaríkin miðluðu og hefur verið í gildi síðan í október, áttu ísraelskar hersveitir að hörfa að svokallaðri „gulu línu“ á Gasa og halda þannig yfirráðum yfir meira en 50 prósentum af landsvæði Palestínumanna.

Ummæli Netanyahu voru fyrsta opinbera vísbendingin um að herinn væri að auka viðveru sína eftir fréttir í fjölmiðlum undanfarnar vikur um að ísraelskar hersveitir væru að færa sig að nýrri svokallaðri „appelsínugulri línu“.

Í fyrsta áfanga vopnahlésins var síðustu gíslunum, sem teknir voru í árásum Hamas á Ísrael 7. október 2023 og komu stríðinu á Gasa af stað, sleppt í skiptum fyrir Palestínumenn í haldi Ísraels.

Annar áfanginn snýst um þau erfiðu mál sem varða afvopnun Hamas og stigvaxandi brotthvarf ísraelska hersins af Gasasvæðinu.

Þar sem lítill árangur hefur náðst í átt að þessum markmiðum í yfirstandandi viðræðum milli Hamas og sáttasemjara hafa ísraelskir fjölmiðlar greint frá því að ef Hamas neiti að afvopnast sé herinn að búa sig undir að hefja bardaga á Gasa að nýju.

Netanyahu hefur gefið í skyn við ýmis tækifæri að Ísrael muni „ljúka verkinu“ ef palestínsku íslamistahreyfingin afvopnast ekki.

Meira en 850 Palestínumenn hafa fallið frá því að vopnahléið hófst, að sögn heilbrigðisráðuneytisins á Gasa, sem starfar undir stjórn Hamas og tölur þess eru taldar áreiðanlegar af Sameinuðu þjóðunum.

Á sama tímabili sagði ísraelski herinn að fimm hermenn hefðu fallið á Gasa.

Þetta er ekki eina víglínan þar sem Ísrael stundar umdeilt athæfi með eyðingu byggða og drápum á almennum borgurum. Mannúðarsamtökin Amnesty International segja Ísrael hafa framið stríðsglæp með því að eyðileggja heimili fólks í suðurhluta Sýrlands. Í gær var palestínskur táningur drepinn á Vesturbakkanum. Og í Líbanon létust 8 börn í loftárásum í fyrradag, en þar hefur Ísrael eytt byggð í nágrenni landamæra ríkjanna. Yfir fjögur hundruð manns hafa látist í Líbanon í átökum eftir að Donald Trump Bandaríkjaforseti tilkynnti um vopnahlé og yfir 10 þúsund heimili skemmst, en bæði Ísraelsher og Hezbollah-samtökin hafa haldið áfram hernaði.