Einn var handtekinn í almennu eftirliti lögreglu þegar lögregla varð vör við „grunsamlega háttsemi“ við grunnskóla þar sem nokkrir einstaklingar virtust skiptast á hlutum.
Í dagbók lögreglu segir að einstaklingarnir hafi orðið flóttalegir þegar þeir urðu varir við lögreglu. Einn tók á rás en sú eftirför varði stutt áður en lögregla hafði uppi á manninum.
Hann hafði bakpoka meðferðis sem innihélt magn af fíkniefnum og fjármunum. Maðurinn var handtekinn og vistaður í fangaklefa.
Hótaði lögreglumönnum öllu illu
Í umdæmi lögreglustöðvar eitt, sem sinnir verkefnum í miðbæ, Austurbæ og á Seltjarnarnesi, var tilkynnt um mann með ógnandi tilburði. Hann var búinn skærum sem hann notaði til að valda eignaspjöllum á nærliggjandi bíl.
Maðurinn var handtekinn á vettvangi en hélt áfram háttsemi sinni þar sem hann hótaði lögreglumönnum öllu illu. Maðurinn var færður í fangaklefa og verður þar þar til hann verður viðræðuhæfur.
Bílahittingur úr böndunum
Þá hefur lögregla til rannsóknar bílahitting á bifreiðaplani við verslunarmiðstöð. Í dagbók lögreglu segir að hittingurinn hafi farið úr böndunum þar sem skemmdir hafi verið unnar á bifreiðum og áflog brutust út.
Nokkrar hávaðakvartanir bárust lögreglu vegna útskriftarveislna sem voru haldnar í gær. Segir í dagbók lögreglu að veislurnar hafi annars farið friðsamlega fram.
